काठमाडौं- धुर्मुस–सुन्तली फाउण्डेशनले चितवनको भरतपुरमा निर्माण गर्ने ‘गौतमबुद्ध अन्तर्राष्ट्रिय क्रिकेट रङ्गशाला’ निर्माण सहयोगार्थ चैत २३ गते अर्थात आउँदो शनिबार त्रि.वि क्रिकेट मैदान कीर्तिपुरमा ‘मातृभूमी कप मैत्रीपूर्ण क्रिकेट प्रतियोगीता’ आयोजना गर्दैछ । 

प्रतियोगीतामा राष्ट्रिय क्रिकेट टिमका खेलाडी र कलाकारबीच प्रतिस्पर्धा हुनेछ । 

क्रिकेट खेलाडीहरुको टिमलाई राष्ट्रिय क्रिकेट टिमका कप्तान पारस खड्काले नेतृत्व गर्नेछन् भने कलाकारहरुको नेतृत्व हाँस्य कलाकारद्धय मदनकृष्ण श्रेष्ठ र हरिवंश आचार्यले गर्नेछन् । 

अहिले प्रतियोगीताको तयारी भब्य रुपमा भईरहेको फाउण्डेशनका अध्यक्ष सिताराम कट्टेल ‘धुर्मुस’ ले जानकारी दिए । उनले कलाकारहरु नियमित अभ्यासमा रहेको बताए । कलाकारहरुको टिमलाई नेपाली राष्ट्रिय क्रिकेट टिमका प्रशिक्षक जगत टमाटाले प्रशिक्षण दिईरहेका छन् । 

कलाकारहरुको तर्फबाट भने पूर्व खेलाडी समेत रहेका कमल मैनाली र सुनिल थापाले पनि प्रशिक्षण दिईरहेका छन् । 

अहिले अभ्यास खेलमा सुनिल थापा, बद्री पंगेनी, कुमार कट्टेल, सन्दीप क्षेत्री, राजु ढकाल, घनश्याम गौतम, सन्तोष लामा, सरोज खनाल, दयाहाङ राई, निश्चल बस्नेत, हेमन्त शर्मा, हेमन्त राना, सुरज सिंह ठकुरी, राजा राजेन्द्र पोखरेल, अर्जुन घिमिरे‘पाँडे’, निर्मल शर्मा, अनुराग कुँवर, कृष्ण काफ्ले र सलिनमान बनिया दैनिक उपस्थित भईरहेका छन् । 

यसैबीच ‘मातृभूमी कप’बाट उठेको रकमको १५ प्रतिशत आँधी प्रभावित क्षेत्रमा खर्च गर्ने गरिने भएको छ ।  

फाउण्डेशनका अध्यक्ष सितारामले सामाजिक संजाल फेसबुकमा एक स्टटस पोष्ट गर्दै बारा र पर्सामा राहत बाँडेको र निरन्तर अभियान चलिरहने जानकारी गराए । 

प्रतियोगीता हेर्नका लागि ३ सय र १ हजार रुपैयाँको टिकटदर राखिएको छ । 

तस्वीर सौजन्यः धुर्मुस–सुन्तली फाउण्डेशन