नयाँ वर्षको शुभकामना (कविता)

बैशाख १, २०७६

अच्युत शाली घिमिरे

नयाँ वर्षको शुभकामना


ADVERTISEMENT

भरि हुने बहानामा

साउदी कतार धाउने

ति आधा पेटहरुलाई,

नयाँ वर्षको शुभकामना

कोरिया जाने लालसामा

आधा रातमा बसेका

लामा लाईनहरुलाई,

नयाँ वर्षको शुभकामना

अष्ट्रेलिया र अमेरिकामा

आफ्नो खुशी बेचेर

खिचिएका रंगिन फोटाहरुलाई,

नयाँ वर्षको शुभकामना

एयरपोर्टमा छोरा ओझेल

नभइन्झेल उघारी उघारी

हेर्ने बाबाका आँखाहरुलाई

अनि हरेक साल दशैंंमा

छोरा आईनपुग्दा

आमालाई लाग्ने बाडुल्कीहरुलाई!!!

 

नयाँ वर्षको शुभकामना

केपीज्यूका पानीजहाज र रेल सपनाहरुलाई,

एकादेशको कथा जस्तो

मेलम्चीको पानी काठमाडौं आउने सपनाहरुलाई,

नयाँ वर्षको शुभकामना

प्रचण्डज्यूका स्वीजरल्याण्ड सपनाहरुलाई,

शेरबहादुरज्यूका जोतिषीका

भविष्यवाणीहरुलाई,

नयाँ वर्षको शुभकामना

रातारात ओझेल पारिने

वाइडबडीका फाईलहरुलाई,

जुन थालमा खायो त्यही 

थालमा थुक्ने आयुक्त पाठकज्यूहरुलाई,

नयाँ वर्षको शुभकामना

एकाएक साउथ इन्डियन 

मूभिको नायक झै

यू टर्न गरेका सिकेज्यूहरुलाई,

एउटा हातबाट राहत दिएर

अर्को हातबाट सेल्फी खिचाउन

बारा झरेका अभियन्ताहरुलाई,

नयाँ वर्षको शुभकामना

थोत्रो जहाजका

होनहार दुई पाइलटहरुलाई,

नयाँ वर्षको शुभकामना

कठै बरा कांग्रेसहरुलाई,

नयाँ वर्षको शुभकामना

छिन्न भिन्न विवेकशील साझाका

पाटपुर्जाहरुलाई,

नयाँ वर्षको शुभकामना

समायोजनका नाममा रोईकराई गर्ने

देशभक्त कर्मचारीहरुलाई,

राजीनामाको धम्की दिदै

माइतीघरमा लम्पसार पर्ने 

चिकित्सकहरुलाई!!!

 

नयाँ वर्षको शुभकामना

उद्योग मन्त्रीका अंग्रेजी भाषणहरुलाई,

भिम रावलका प्रतिपक्ष भूमिकाहरुलाई,

राष्ट्रपतिज्यूका राजकीय

सवारीहरुलाई,

नयाँ वर्षको शुभकामना

परराष्ट्रमन्त्रालयका त्रुटिहरुलाई

भेनेज्युएला प्रकरणहरुलाई

रेडकार्पेटमा सल्बलाउने साँपहरुलाई,

नयाँ वर्षको शुभकामना

कर नतिरी भाग्न खोज्ने

एनसेलहरुलाई,

प्रतिबन्ध भोग्ने विप्ल्व दाजुहरुलाई,

नयाँ वर्षको शुभकामना

रित्ता प्रधानमन्त्री रोजगार 

कार्यक्रमका कार्यालयहरुलाई,

सामाजिक सुरक्षा योजनाका

जटिलताहरुलाई,

नयाँ वर्षको शुभकामना

मिस नेपालमा मेक अप खोज्ने कडा जजहरुलाई,

बौद्धिकता जाच्न एसइईमा उत्रिएका

करिस्मा मानन्धरहरुलाई,

नयाँ वर्षको शुभकामना

कुलमान सिध्याउन

सल्बलाउने किराहरुलाई,

भ्रष्टचारी काखी च्यापी

मोटाउने शासकहरुलाई,

नयाँ वर्षको शुभकामना

आउट भएका

एसइईका प्रश्नपत्रहरुलाई,

रस्साकस्सी गरेरै 

जबरजस्ती पास भएका

चिकित्सा विधेयकहरुलाई,

नयाँ वर्षको शुभकामना

वर्षौ देखि विद्यार्थी लुटी खान पल्केका

गण्डकी मेडिकल कलेजका माफियाहरुलाई,

नयाँ वर्षको शुभकामना

विदेशीलाई सजिलै

नागरिकता बाड्ने प्रपञ्चहरुलाई,

नयाँ वर्षको शुभकामना

पशुपति शर्माका

उग्रगामी गितहरुलाई,

त्यही गितका पछि

डौडिने अरिंगालहरुलाई!!

 

नयाँ वर्षको शुभकामना

झोपडीमा सिस्नु खाएर पनि

महलको कर तिर्ने हाम्रा संकल्पहरुलाई,

नयाँ वर्षको शुभकामना

आफ्ना नेतालाई देवता मान्दै

पुरा नहुने भाषणमा पनि ताली पिट्ने हाम्रा हातहरुलाई,

नयाँ वर्षको शुभकामना

आफू धूलोमा लटपटिएर

देशमा चै वसन्तको वहार खोज्ने

हाम्रा अठोटहरुलाई,

नयाँ वर्षको शुभकामना

अरुको उन्नतिमा

आफ्नो अधोगति देख्ने

हाम्रा कृतज्ञताहरुलाई!!!

 

चिकित्सा शास्त्र अध्ययन संस्थान

बैशाख १, २०७६ मा प्रकाशित

प्रतिक्रिया दिनुहोस

ताजा समाचार