जनकपुरधाम - प्रदेश सरकारले जनकपुर अञ्चल अस्पताललाई प्रदेश नम्बर दुईको प्रादेशिक अस्पताल नामकरण गर्ने निर्णय गरेको छ । प्रदेश नम्बर दुईको सामाजिक विकास मन्त्रालयले विगतमा अञ्चल अस्पतालको रूपमा रहेको जनकपुर अञ्चल अस्पतालको स्वरूपलाई प्रादेशिक अस्पताल नामकरण गर्ने निर्णय गरेको छ ।

बुधवार सामाजिक विकास मन्त्री नबलकिशोर साहले मन्त्रालयद्वारा उक्त नामकरण प्रस्तावबारे उठाइएको टिप्पणी आदेशमा निर्णय गरेको हो । 'उक्त नामकरण प्रस्ताव भोलि ५ गते बस्ने मन्त्रिपरिषदको बैठकमा लग्ने तयारी गरेका छौं,' मन्त्री साहले लोकान्तरसँग भने, 'नाम मात्र फेर्न लागेका छैनौं, प्रादेशिक अस्पतालका लागि आवश्यक सम्पूर्ण पूर्वाधार पनि त्यसै अनुसार विकसित गर्दै जाने तयारी गरेका छौं ।'

बिहीवार बस्ने मन्त्रिपरिषद बैठकमा अन्य मन्त्रीले पनि सर्वसम्मत ढंगले उक्त प्रस्तावलाई पारित गर्नेमा समेत आफू आशावादी रहेको उनले बताए । जनकपुर अहिले प्रदेशको अस्थायी राजधानी समेत रहेकाले उक्त अञ्चल अस्पताललाई प्रादेशिक अस्पताल नामकरण गरिएको उनले बताए ।

विगतमा संघीय सरकार मातहत रहेको जनकपुर अञ्चल अस्पताल अहिले प्रदेश सरकारको मातहत आइसकेको छ । उपेन्द्र यादव स्वास्थ्य मन्त्री भएपछि प्रदेश सरकारलाई हस्तान्तरण गरिएको थियो । उक्त अस्पतालको बजेटदेखि कर्मचारी नियुक्तिसम्म सबै काम प्रदेश सरकारको सामाजिक विकास मन्त्रालयमार्फत संचालन भइरहेको छ ।

२ सय शैय्याको उक्त अस्पतालमा १ सय शैय्या सरकार र १ सय शैय्या विकास समितिमार्फत संचालित रहेको थियो । अहिले विकास समिति विघटन भएको छ ।