विराटनगर – जन्मको आधारमा नागरिकता प्राप्त गरेका नागरिकका सन्तानलाई वंशजको नागरिकता दिन सर्वोच्च अदालतको आदेशसँगै जिल्ला प्रशासन कार्यालयमा नागरिकता लिन भारतीय नम्बर प्लेटका मोटरसाइकलसहित आएका सेवाग्राहीको लाम लागेको छ ।

मोरङका जिल्ला प्रशासन कार्यालय मोरङ, ईलाका प्रशासन कार्यालय रंगेली र ईलाका प्रशासन कार्यालय उर्लावारी लगायतका ठाउँमा नागरिकता लिन आउनेको भीड छ ।

विराटनगरमा दैनिक १ सय ५० देखि २ सय जनाले नागरिकता लिँदै आएका छन्  ।

जन्मसिद्ध नागरिकका सन्तानलाई वंशजको आधारमा नागरिकता दिन बाटो खुला गरेपछि सिमावर्ती क्षेत्रमा नागरिकता लिनेको बढी भीड छ । यसरी नागरिकता लिन आउने अधिकांश व्यक्ति भारतीय नम्बरका गाडीमा आउने गरेका छन् ।

ईलाका प्रशासन कार्यालय रंगेलीको मूलगेटमा नागरिकता वितरणको काम शुरू भएसँगै दैनिक १० वटा बढी भारतीय नम्बर प्लेटका मोटरसाईकल देखापर्न थालेका छन् । ईलाका प्रशासन कार्यालय रंगेलीबाट दैनिक ६० देखि ६५ वटा नागरिकता वितरण हुँदै आएकोमा हाल दोब्बर बढीले नागरिकता लिइरहेको ईलाका प्रशासन कार्यालय रंगेलीले जनाएको छ ।

मोरङमा बिहीवारसम्म करीब १ हजार बढीले जन्मसिद्धका छोराछोरीले वंशजको आधारमा नागरिकता प्राप्त गरिसकेका छन् । मोरङका सहायक प्रमुख जिल्ला अधिकारी चन्द्रकला ओलीले ईलाका प्रशासन कार्यालय रंगेली, ईलाका प्रशासन कार्यालय उर्लावारी तथा जिल्ला प्रशासन कार्यालय विराटनगरवाट नागरिकता वितरणको काम भइरहेको बताइन् ।

उनले जिल्ला प्रशासन कार्यालयमा मात्र टोकनबाट नागरिकता लिनेमध्ये ३ हजार ५ सय बढीले टोकन लिइसकेका जानकारी दिइन् ।

गृह मन्त्रालयको परिपत्र अनुुसार चैत १९ गतेदेखि  त्यसप्रकारको नागरिकता वितरण शुुरू भएको छ । त्यसपछि सर्वाेच्च अदालतको आदेश अनुसार चैत २६ गतेदेखि वैशाख ३ गतेसम्म नागरिकता वितरणको काम रोकिएको थियो । अदालतको निर्णयपछि वैशाख ४ गतेदेखि नागरिकता वितरणको काम फेरि शुरू भएको छ । 

नागरिकता लिनेको संख्या बढेसँगै कर्मचारी थप गरेर सहज रुपमा नागरिकता दिने व्यवस्था मिलाइएको ओलीले बताइन् । जन्मसिद्धका छोराछोरीलाई वंशजका आधारमा नागरिकता वितरणको लागि आमा र बुवाको नेपाली नागरिकताको प्रमाणपत्र अनिवार्य गरिएको छ ।