एकता टुंग्याउन नेकपाका नेताहरु अन्तिम कसरतमा, कसरी मनाइएला माधव नेपाललाई ?

बैशाख ७, २०७६

काठमाडौं– सत्तारुढ दल नेपाल कम्युनिस्ट पार्टी (नेकपा) को एकता टुंगो लगाउन शीर्ष नेताबीच सघन छलफल अघि बढेको छ । लामो समयको अनिश्चय चिर्ने उद्देश्यका साथ शीर्ष नेता एकतालाई अन्तिम रूप दिने कसरतमा लागेका हुन् ।
सोही कसरतअनुसार शनिबार प्रधानमन्त्री तथा पार्टी अध्यक्ष केपी ओली, अर्का अध्यक्ष पुष्पकमल दाहाल र शीर्ष नेता माधवकुमार नेपालबीच एकता टुंगो लगाउन निर्णायक छलफल हुने नेकपाका एक नेताले बताए ।
एकता टुंगो लगाउन शुक्रबार पार्टी अध्यक्ष ओली र वरिष्ठ नेता नेपालबीच छलफल भएको छ । प्रधानमन्त्री निवास बालुवाटारमा भएको छलफलमा तल्लो तहको कमिटी टुंगो लगाउने विषयमा छलफल भएको हो । छलफलमा वरिष्ठ नेता नेपालले मापदण्ड, विधि, प्रक्रिया, वरिष्ठताका आधारमा नेतृत्व टुंगो लगानुपर्ने सुझाव दिएका छन् ।

ओली र नेपालबीच बिहीबारसमेत सोही विषयमा छलफल भएको थियो । यसअघि वरिष्ठ नेता झलनाथ खनालसहित सचिवालय सदस्यहरू वामदेव गौतम, ईश्वर पोखरेल, रामबहादुर थापा, महासचिव बिष्णु पौडेलबीचमा एकता टुंगो लगाउने विषयमा छलफल भएको थियो ।
लेनिन जयन्ती तथा पार्टी स्थापना दिवसका दिन पारेर पार्टीको तल्लो तहको एकता प्रक्रिया टुंगो लगाउने गरी छलफल भइरहेको नेकपाका नेताहरूले बताएका छन् ।
नेकपाको अहिलेसम्ममा सचिवालय, केन्द्रीय कमिटी, प्रदेश कमिटी मात्रै गठन भएको छ । घोषणा भइसकेको प्रदेश कमिटीको विषयमा ओली, दाहाल र नेपालबीच विवाद छ । केन्द्रीय सदस्यहरूको जिम्मेवारी बाँडफाँट, पोलिटब्युरो कमिटी गठन, विभाग, जनवर्गीय संगठनको एकता, जिल्लादेखि स्थानीय तहसम्मका कमिटी अझै गठन हुन सकेका छैनन् ।


ADVERTISEMENT

७७ जिल्ला कमिटिमध्ये ४५ तत्कालीन एमाले र ३२ माओवादी केन्द्रले नेतृत्व लिने समझदारी शीर्ष नेताबीच भए पनि नेतृत्वको विषय अझै टुंगो लाग्न सकेको छैन । नेतृत्वको टुंगो लगाउने विधि, प्रक्रिया एवं मापदण्डमा केन्द्रित भई शीर्ष नेताबीच छलफल भइरहेको पार्टी स्रोतले जानकारी दिएको छ ।
वरिष्ठ नेता नेपालले पार्टीमा जिम्मेवारी चयनमा एकलौटी गर्न खोजेको भन्दै निरन्तर असन्तुष्टि जनाउँदै आइरहेका छन् । उनले कमिटीको एकता कमिटी–कमिटीको हुनुपर्ने र त्यसका लागि निश्चित विधि बनाएर जानुपर्ने पक्षमा अडान राख्दै आइरहेका छन् । तर, प्रधानमन्त्री ओली एकता प्रक्रिया विशिष्ट अवस्थामा भएकाले विगत कमिटीमा रहेका मात्रै भनेर अल्झिन नहुने भन्दै सबै नेताले आआफ्नो जिद्दी छोडनुपर्ने अडानमा छन् । राजधानी दैनिकमा खबर छ ।

बैशाख ७, २०७६ मा प्रकाशित

प्रतिक्रिया दिनुहोस