सुर्खेत- कर्णाली प्रदेशको राजधानी वीरेन्द्रनगरमा वैशाख १२ गते देखि आयोजना गर्न लागिएको कर्णाली प्रिमियर लिगको (केपीएल) लागि मैदान निर्माणको काम अन्तिम चरणमा पुगेको छ । देशभरका आठ टोलीले सहभागिता जनाउने उक्त प्रतियोगिताका विजेताले पाँच लाख र उपविजेताले दुई लाख रुपैयाँ पुरस्कार पाउनेछन् । कर्णाली प्रदेशको सबैभन्दा ठूलो क्रिकेट प्रतियोगिता भएको आयोजकको दाबी छ ।

‘मैदान सम्याउने, पिच र बाउन्ड्रीको लेभल मिलाउने लगायतको काम लगभग सकिएको छ,’ कर्णाली प्रिमियर लिग दोस्रो संस्करणका संयोजक रेशम शाहीले भने,‘यस पटक दर्शकका लागि न्यूनतम मूल्यमा टिकट शुल्क लगाएका छौं । ३० रुपैयाँ, एक सय र तीन सय रुपैयाँको टिकट शुल्क तोकेका छौं ।’

कर्णाली क्रिकेट एकेडेमीको आयोजनामा हुने प्रतियोगितामा सहभागि समूहमध्ये विजेतालाई पाँच लाख रुपैयाँको नगद पुरस्कार राशी प्रदान गरिने छ । प्रतियोगितामा दोस्रो टीमलाई दुई लाख रुपैयाँ, म्यान अफ द सिरिजलाई ५० हजार रुपैयाँ, उत्कृष्ट ब्याट्सम्यान र बलरलाई २०–२० हजार रुपैयाँ नगद प्रदान गरिने छ। यस्तै प्रत्येक खेलमा 'म्यान अफ द म्याच' हुने खेलाडीले तीन हजार पाँच सय रुपैयाँ पुरस्कार पाउने छन् ।

प्रतियोगितामा तीन विभागीयसहित आठ टीम सहभागी हुँदैछन् । बसन्त रेग्मीको कप्तानीमा सशस्त्र प्रहरीको एपीएफ क्लब, विनोद भण्डारीको कप्तानीमा त्रिभुवन आर्मी क्लब र मञ्जीत श्रेष्ठको कप्तानीमा नेपाल पुलिसको टीम प्रतियोगितामा सहभागी हुनेछन् ।

यस्तै, कर्णाली क्रिक्रेट एकेडेमीमा रविन्द्रजंग शाही, महेन्द्रनगर क्रिकेट एकेडेमी (कञ्चनपुर) बाट सुशिल खड्काले टीमको नेतृत्व गर्नेछन् । मेहबुब आलमले लालिगुराँस क्रिकेट एकेडेमी (झापा) र अजय साहनीले मध्यपश्चिम क्रिकेट (बाँके) र सुरेन्द्र चन्दले हिमालयन क्रिकेट एकेडमी (काठमाडौं) को टीमको नेतृत्व गर्नेछन् । प्रतियोगिता अवधिभर १५ वटा खेल हुने आयोजकले जनाएको छ । पहिलो र अन्तिम दिन एक-एक वटा खेल हुनेछन् भने अन्य दिन दुई–दुई वटा खेल हुने आयोजकले जानकारी दिएको छ ।