दलित महिलालाई कपाल मुण्डन गर्दै कुटपिट, आरोपितलाई सार्वजनिक शान्ति विरुद्धको कसूरमा मुद्दा

बैशाख ८, २०७६

जनकपुरधाम- जनकपुरधाम उपमहानगरपालिकामा एक जना दलित महिला अभद्र व्यवहारको शिकार भएकी छिन् । आफ्नो श्रीमानको घर छाडेकी ती महिला श्रीमानकै सहमतिमा घर फर्किएकी थिइन् तर फर्केपछि उनलाई गाउँलेले कपाल मुण्डन गरी सामजिक रुपमा समेत दुर्व्यहार गरेका छन् ।

जनकपुरधाम उपमहानगरपालिका वडा नम्बर २५ को लोहना गाउँमा ३५ वर्षीय ती मुसहर समुदायकी महिलालाई गाउँलेले कुटपिट गर्दै कपाल मुण्डन गरेर दुर्व्यवहार गरेका थिए । 


ADVERTISEMENT

उक्त वडाका वडाध्यक्ष उमेश यादवका अनुसार गत शुक्रवार राति १० बजेको समयमा उनकै समुदायका मान्छेले पंचायत गर्न बोलाए । पंचायतमा उपस्थित भएको बेला उनको कपाल काटिएको थियो ।

‘ती महिला करिब ४/५ महिना अगाडि घर छाडेर भागेकी थिइन्, पछि श्रीमानकै सहमतिमा उनी घर फर्किइन्,’ वडाध्यक्ष यादवले भने, ‘पंचायतमा रहेका मानिसले ती महिलाको कपाल काटेर दुई चार झापड समेत हानेका थिए ।’ भोलि बिहान कालो चुनाको टिका लगाएर गाउँमा घुमाउने भनेर पंचायतमा बस्नेहरुले धम्की समेत दिएको स्थानीयले बताएको यादवले लोकान्तरलाई बताए ।

उनका अनुसार घटना भएको भोलि पल्ट पिडित महिला नगराइन नगरपालिकाको देबडीहा प्रहरी चौकीमा निबेदन लिएर पुगे पछि प्रहरीले घटनामा संलग्न भएकाहरुलाई पक्राउ गरेको हो । मुसहर समुदाय निरक्षर समुदाय भएको र जनचेतनाको अभाव समेत भएकाले त्यस्तो घटना हुन गएको उनले बताए । राती मुसहरहरुले रक्सी खाएर त्यस्तो घटना गराएको उनले बताए ।

जिल्ला प्रहरी कार्यालय धनुषाका प्रहरी उपरीक्षक शेखर खनालका अनुसार दुर्व्यवहार गर्ने ८ जनालाई पक्राउ गरिएको छ । ‘श्रीमानको घर छाडेर केही दिन अगाडि अर्कै पुरुषसँग गएकी थिइन् तर पछि श्रीमानसँगकै समझदारीमा घर फर्किएकी थिइन्,’ एसपी खनालले भने, ‘तर, गाउँलेहरुले मर्यादा र सीमा नाघेको भन्दै महिलालाई कपाल मुण्डन गर्दै अभद्र व्यवहार गरेका थिए ।’

घटनाबारे प्रहरीले जानकारी पाएलगत्तै पीडित महिलालाई उद्धार गरेको र संलग्नहरुलाई पक्राउ गरेको उनले बताए ।

पक्राउ पर्नेहरुमा लोहनाका ४० वर्षीय रामदुलार सदा, २८ वर्षीय रामविनय सदा, ३७ वर्षीय हरिराम सदा, ३५ वर्षीय लुचवा सदा, ४१ वर्षीय शिवचरण सदा, ३५ वर्षीय राजविर सदा, ३६ वर्षीय रंजित सादा, १९ वर्षीय सन्तोष सदा रहेका छन्  ।

सार्वजनिक शान्ति विरुद्धको कसुरमा उनीहरु विरुद्ध मुद्दा दर्ता भएको खनालले बताए ।

 

बैशाख ८, २०७६ मा प्रकाशित

अजय अनुरागी

अजय अनुरागी लोकान्तरका लागि प्रदेश नम्बर दुई प्रतिनिधि हुन् । 

लेखकबाट थप...

प्रतिक्रिया दिनुहोस