बलिउड अभिनेता सन्नी देओल भाजपामा प्रवेश, गरे मोदीको प्रशंसा

बैशाख १०, २०७६

काठमाडौं – बलिउड अभिनेता सन्नी देओल मंगलवार भारतीय जनता पार्टीमा प्रवेश गरेका छन् । उनलाई पञ्जाबको कुनै लोकसभा सीटबाट उठाउन सकिने अनुमान गरिएको छ । 

‘बुवा धर्मेन्द्र पूर्व प्रधानमन्त्री वाजपेयीजीसँग जोडिनुभएको थियो । म मोदीजीसँग जोडिँदैछु । उहाँले देशका लागि धेरै गरिसक्नुभएको छ र उहाँले नै देशलाई अघि बढाउनुहुनेछ । देशमा उहाँ जस्ता नेता आवश्यक छन्,’ ६२ वर्षीय अभिनेताले भने । आफूले जे गरे पनि भित्री हृदयबाटै गर्ने उनको भनाइ छ । 


ADVERTISEMENT

उनलाई पार्टीमा स्वागत गर्दै रक्षामन्त्री निर्मला सीतारमणले भनिन्, ‘म लोकप्रिय अभिनेता सन्नी देओललाई भाजपामा स्वागत गर्न पाउँदा खुशी छु ।’

देओल परिवारको भाजपासँगको लामो सम्बन्धको स्मरण गर्दै नेता पीयूष गोयलले सन्नीका पिता वरिष्ठ अभिनेता धर्मेन्द्रले बिरामी हुँदा पनि सन् २००४ मा बिकानेरबाट चुनाव लडेर प्रचण्ड बहुमत ल्याएको बताए । सन्नीले पनि राजनीतिमा छाप छोड्ने आशा गोयलले गरे । 

धर्मेन्द्रले सन् २००४ र २००९ मा बिकानेर लोकसभा सीट जितेका थिए । अहिलेको चुनावमा उनले आफ्नी पत्नी हेमा मालिनीका लागि मथुरामा चुनाव प्रचार गरिरहेका छन् । 

सन्नीले अघिल्लो साता भाजपा अध्यक्ष अमित शाहलाई भेटेका थिए र उनले अमृतसर वा गुरदासपुरबाट चुनाव लड्ने अनुमान गरिएको छ ।

हिन्दुस्तान टाइम्सबाट

बैशाख १०, २०७६ मा प्रकाशित

प्रतिक्रिया दिनुहोस