बाजुरा – नेपाली सेनाको टोली कोल्टी छोडेर अछाम फिर्ता गएकोे छ । सेनाको ब्यारेक राख्ने उचित स्थान नपाएपछि सेना १८ वर्षपछि कोल्टी छोडेर फर्किएको हो ।

ब्यारेक राख्ने जमिन उपलब्ध गराउन सेनाले स्थानीयलाई आग्रह गरेपनि उपयुक्त जमिन नभेटिएपछि अछाम फर्किएको सेनाको भनाइ छ । पुरानो ब्यारेक बसेको स्थान बस्नलायक नभएको र वर्षात्को समयमा असुरक्षित भएकाले अर्को स्थानमा ब्यारेकका लागि जमिन दिन माग गरेको थियो । 

सेनाको गुल्म गएको ३ वर्षदेखि कोल्टी गाउँको जिउलामा रहेको सामुदायिक विद्यालयमा बस्दै आएको थियो । स्थानीय राजनीतिक दलदेखि अन्य निकायसँग निरन्तरताको पहल गरिएपनि असफल भएको दाबी सेनाको छ । सेनाको टोली कोल्टीबाट सोमबार अछाम फिर्ता भएको हो । 

ब्यारेक कोल्टीमै राख्न सामाजिक सञ्जालदेखि अन्य क्षेत्रबाट दबाब भएपनि राजनीतिक दल, नगरपालिका र स्थानीय अगुवाले बेवास्ता गर्दा फिर्ता गएको नागरिक अगुवा लक्ष्मण जोशीले बताए ।

कोल्टीमा रहेको भवानी बक्स गुल्म अछामको गणमा गएको हो । भवानी बक्स गण अछामका प्रमुख सेनानी लोचन कार्कीले भने त्यहाँ अब गुल्म राख्नुपर्ने आवश्यक नरहेकाले अछाम फिर्ता बोलाइएको बताए ।

पहिले बस्दै आएको ब्यारेक क्षेत्र प्राकृतिक रुपमा सुरक्षित नरहेको भन्दै नेपाली सेनाको प्राविधिक टोलीले नबस्न भनेपछि वैकल्पिक व्यवस्था नहँुदासम्म ३ वर्षदेखि बूढिनन्दा क्याम्पसको भवनमा भवानी बक्स गण ‘क’ बस्दै आएको थियो । 

लामो समयदेखि विद्यालयको भवनमा बस्न नसक्ने अवस्था आएपछि सेनाको मुख्यालयले फिर्ता बोलाएको भवानी बक्स गुल्म कोल्टीका सेनानी हरिरामकुमार श्रेष्ठले जानकारी बताए । सेना कोल्टीमा २०७१ सालदेखि बस्दै आएको थियो ।

शान्ति सुरक्षादेखि विपद् व्यवस्थापनका सेनाले खेल्ने भूमिका उच्च रहने हुँदा जिल्लामा रहनुपर्ने दबाब स्थानीयको थियो । कोल्टी क्षेत्रका चारवटा स्थानीय तहलाई लक्षित गरेर सेना आवश्यक हुने दाबी स्थानीयको छ । जिल्लामा विमानस्थल पनि भएकाले उच्चपदस्थ पदाधिकारीको सुरक्षा सहजताका लागि समेत सेना राख्नुपर्ने उनीहरूको भनाइ छ । 

बूढिनन्दा नगरपालिकाका उपप्रमुख सृष्टी रेग्मीले भने जग्गाको समस्याले नभई सेनाले नै बस्न नचाहेको बताइन् । ‘रक्षा मन्त्रालयलाई समेत जग्गा उपलब्ध गराएर सेनालाई यथावत् गर्न आग्रह गरिएपनि गुल्म नबसेको हो,’ उनले भनिन् ।