एउटै सडकमा ३ तहका सरकारको लगानी, बर्खाअघि काम सक्ने लक्ष्य

प्रतिकात्मक तस्वीर
बैशाख १०, २०७६

दमौली – एउटै सडकमा ३ तहका सरकारले लगानी गरेको पाइएको छ ।

तनहुँको प्रसिद्ध धार्मिक तीर्थस्थल छाब्दीबाराही जाने मोटरमार्ग कालोपत्रेका लागि संघीय, प्रदेश र स्थानीय तहले बजेट विनियोजन गरेका हुन् ।


ADVERTISEMENT

दमौलीदेखि छाब्दीसम्मको ७ किलोमिटर कच्चीसडक कालोपत्रेका लागि ब्यास नगरपालिकाले २ करोड रुपैयाँ, संघीय र प्रदेश सरकारले १–१ करोड रुपैयाँ बजेट विनियोजन गरेका छन् । ३ वटै तहका सरकारको छुट्टाछुट्टै बजेटमा उक्त मार्गको ३ किलोमिटर खण्डमा कालोपत्रे गर्न काम शुरू भएको छ ।

सडकलाई ३ खण्डमा विभाजन गरेर ३ तहको सरकारले विनियोजन गरेको रकमले कालोपत्रेको काम शुरू भएको सडक उपभोक्ता समितिका सचिव निर्मल पण्डितले जानकारी दिए ।

दमौलीबाट छाब्दीतर्फ जाने पहिलो खण्डमा संघीय सरकारले विनियोजन गरेको १ करोड रुपैयाँबाट पक्की नाला निर्माण र करीब ८०० मिटर सडक कालोपत्रे शुरू भएको पण्डितले बताए ।

गण्डकी प्रदेश सरकारले विनियोजन गरेको १ करोडबाट छाब्दीबाट दमौलीतर्फ आउने त्यति नै दूरी सडकमा पक्की नाला निर्माणसहित सडक चौडा र कालोपत्रेको काम शुरू गर्ने तयारी गरिएको छ ।

यसैगरी ब्यास नगरपालिकाले विनियोजन गरेको २ करोड रुपैयाँ बजेटबाट भड्खलादेखि गौंडाको पहराको पूर्वतर्फको उकालोसम्मको सडकखण्डमा कालोपत्रेको काम भइरहेको छ । बस नगरपालिकाले यो मार्गलाई नगरस्तरीय मार्गको रुपमा छनोट गरी कालोपत्रेका लागि बजेट विनियोजन गरेको नगरपालिकाका प्रमुख प्रशासकीय अधिकृत दिनेशराज पन्तले बताए ।

ब्यास नगरपालिकाका प्रमुख बैकुण्ठ न्यौपानेले एउटै आयोजनालाई तीन सरकारले बाँडेर आ–आफ्नो तरिकाले काम गर्ने र त्यहाँका जनतालाई सबैले यो योजना हाम्रो हो भन्ने जटिल अवस्था सिर्जना भएको बताए ।

संघ र प्रदेश बजेटबाट कालोपत्रे हुने सडकको ठेक्का डायमन्ड कन्स्ट्रक्सन प्रालि दमौलीले पाएको छ भने ब्यास नगरपालिकाको ठेक्का जिएस कन्स्ट्रक्सन प्रालि दमौलीले पाएको छ । सडक डिभिजन कार्यालय दमौलीका प्रमुख विष्णु काफ्लेले छाब्दीमार्गलाई उच्च प्राथमिकतामा राखेर बर्खा शुरू हुनु अगाडि नै कालोपत्रे सकिने गरी काम गरिने बताए ।

सडक कालोपत्रे नहुँदा वर्षायामको समयमा हिलो र हिउँदमा धुलोले सर्वसाधारण मर्कामा पर्दै आएका थिए । स्थानीयले छाब्दी मार्ग कालोपत्रेका लागि जनप्रतिनिधिलाई पटक–पटक दबाब दिँदै आएका थिए ।

बैशाख १०, २०७६ मा प्रकाशित

प्रतिक्रिया दिनुहोस

ताजा समाचार