विराटनगर- मोरङको पथरी शनिश्चरे नगरपालिका १ बस्ने रिना बस्नेतको मृत्युको विषयलाई लिएर केही अनलाईन मिडियाहरूमा अतिरन्जित हेडलाईन दिएर समाचार प्रकाशन भएको भन्दै प्रहरीले धम्कीपूर्ण विज्ञप्ति जारी गरेको छ ।

अतिरन्जित हेडलाईन दिएर प्रकाशन भएका समाचारप्रति जिल्ला प्रहरी कार्यालय मोरङको गम्भीर ध्यानआकर्षण भएको विज्ञप्तिमा उल्लेख गरिएको छ । जिल्ला प्रहरी कार्यालय मोरङका डिएपी घनश्याम श्रेष्ठको नाममा आएको विज्ञप्तिमा घटनाको सुक्ष्म अनुसन्धान भईरहेको अवस्थामा भ्रमपूर्ण समाचार आएको बताइएको छ ।

‘मृतकको लाश उक्त घटनास्थलमा ठेलामा राखी फालेको सीसीटीभीमा देखियो’ जस्ता शीर्षक राखी तथ्यहीन, कपोकल्पित र मनगणन्ते तवरबाट समाचार प्रकाशन गर्दा यसले आम जनमानसको सत्य तथ्य समाचार प्राप्त गर्न पाउनुपर्ने सूचना सम्बन्धि मौलिक हकको समेत हनन् भएको उल्लेख छ ।

'एकजना महिलाको मृत्यू भएको संवेदनशील विषयमा अनर्गल रूपमा सामाजिक सद्भाव भड्काउने उदेश्यले दुष्प्रचार गरी असंवेदनशीलताको सीमा पार गर्ने सम्बद्ध गैरजिम्मेवार मिडियामाथि समेत निगरानी बढाईएको छ,' विज्ञप्तीमा भनिएको छ ।

घटनास्थल क्षेत्रको सो समयको सीसीटीभी फुटेज प्रहरीले अनुसन्धान गरीरहेको र उक्त रात त्यस्तो ठेला लिई कोही कसैले मृतकको लास नफालेको अनुसन्धानबाट देखिएको प्रहरीले विज्ञप्तिमा स्पष्ट पारेको छ । सीसीटीभी फुटेजमा देखिएका मानिसहरू उक्त क्षेत्रमा तरकारी ओसारपसार गर्ने ज्यालादारी मजदुरहरू रहेको, निजहरू आफ्नो दैनिक रोजिरोटीको क्रममा तरकारी लैजाने ल्याउने कामको सिलसिलामा बिहान करिब ५ बजेको समयमा उक्त स्थानमा गएको हालसम्मको अनुसन्धानको क्रममा खुलेको प्रहरीले बताएको छ ।

यो घटनापछि प्रहरीले मिडियाको नाम उल्लेख नगरेपनि अनलाईन मिडियालाई लक्षित गरी निगरानी गरिएको धम्कीपुर्ण विज्ञप्तिपछि नेपाल पत्रकार महासंघ मोरङका उपाध्यक्ष कुमोद अधिकारीले धम्कीपुर्ण अभिव्यक्तिका बारेमा नेपाल पत्रकार महासंघको गम्भीर ध्यानाकर्षण भएको बताएका छन् । जिल्ला प्रहरी कार्यालय मोरङका एसपी मनोज केसीसँग कुरा भइसकेकोले भोलि बसेर के कुरा हो टुंग्याइने उपाध्यक्ष अधिकारीले बताए ।