काठमाडौं– नेपालमा चल्ने कारहरूको अधिकांश हिस्सा भारतमा बनेका कारले नै ओगटेको छ । नेपालमा ९० प्रतिशतको हाराहारीमा भारतमा निर्मित कारको खपत हुने गरेको बताइन्छ ।

नेपालमा कार चढ्नेहरूले कारको खरीद मूल्य, रिसेल भ्यालु  र इन्सुरेन्स लगायतका विषयमा मात्रै चासो राख्छन् । कार खरीद गर्नुअघि खरीदकर्ताले मूल्य, इन्सुरेन्स लगायतका विषयमा मात्रै बुझ्ने र सोध्ने गर्छन् । खासमा कार खरीदकर्ताहरूले कारले दिने आरामदायी, भरपर्दो तथा सुरक्षित यात्राको बारेमा खासै चासो नराख्ने व्यवसायी बताउँछन् ।

बढ्दो सवारी साधन लगायत विभिन्न कारणले नेपालमा औसतमा प्रत्येक दिन सडक दुर्घटना भइरहेको छ । दुर्घटनाका कारण मानिसहरूले अकालमै ज्यान गुमाउनु परेको छ ।

बढ्दो दुर्घटनाका कारण मानिसको ज्यान जोखिममा पर्न थालेपछि कम्पनीहरूले यात्रुको सुरक्षामा ध्यान दिन थालेका जानकारहरू बताउँछन् । आपसी प्रतिस्पर्धाका कारण पनि पछिल्लो समय कार निर्माता कम्पनीहरूले यात्रु सुरक्षाका बारेमा विशेष चासो दिन थालेका छन् ।

कारको सुरक्षा सम्बन्धमा परीक्षण गर्ने अन्तर्राष्ट्रिय संस्था ‘ग्लोबल एनक्याप’ (ग्लोबल न्यु कार असेसमेन्ट प्रोग्राम)ले गरेको परीक्षणमा सुरक्षाको दृष्टिकोणले टाटाको नेक्सन कार उत्कृष्ट रहेको पाइएको छ । भारतभर सबैभन्दा बढी अंक प्राप्त गर्दै टाटाको नेक्सन उत्कृष्ट रहेको पाइएको हो । ग्लोबल एनक्यापले गरेको परीक्षणमा टाटाको नेक्सनले ‘फाइभ स्टार’ र्‍याङकिङ प्राप्त गर्दै उत्कृष्ट रहेको पुष्टि गरेको छ । ग्लोबल एनक्यापका अनुसार यस्तो र्‍याङकिङ कुल ‘फाइभ स्टार’ नै हुन्छ ।

ग्लोबल एनक्यापका महासचिव ड्याविड वार्डले टाटा नेक्सन सुरक्षाको दृष्टिकोणले फाइभ स्टार र्‍याङकिङ प्राप्त गरेको र टाटा मोटर्सका लागि यो ऐतिहासिक रहेको बताएका छन् ।

‘भारतमा सुरक्षाको दृष्टिकोणले टाटा नेक्सन फाइभ स्टामा दर्ता भएको छ,’ वार्डले भनेका छन्, ‘यो ऐतिहासिक उपलब्धिका लागि टाटा मोटर्सलाई बधाई छ ।’ वार्डले टाटाको नेक्सनले पाएको फाइभ स्टार र्‍याङकिङले भारतमा टाटा कारको सुरक्षा क्षमता प्रमाणित गरेको र अन्य कार कम्पनीहरूलाई समेत सुरक्षित कार बनाउनेतर्फ डोर्‍याउने बताएका छन् ।

यसअघि सुरक्षाको दृष्टिकोणले ‘थ्री स्टार’ र्‍याङकिङमा रहेको यसले सुरक्षा मामिलामा केही स्थान सुधार गरेको ग्लोबल एनक्यापले जानकारी दिएको छ ।

टाटा नेक्सनले सय प्रतिशत नै र्‍याङकिङ प्राप्त गर्दै सुरक्षाका दृष्टिकोणले भारतभित्र उत्कृष्ट रहेको प्रमाणित गरेको कम्पनीले दाबी गरेको छ ।

वयस्क, बालबालिका तथा ड्राइभर सुरक्षाका दृष्टिकोणले यसअघि थ्री स्टार र्‍याङकिङ रहेको थियो ।

‘टाटा नेक्सन’ यात्राको सन्दर्भमा भारतमा सबैभन्दा सुरक्षित एसयुभीमा दर्ता भएको टाटा मोटर्सले जानकारी दिएको छ ।

मूल्य लगायतका अन्य विषयभन्दा पनि सुरक्षाको विषयलाई नै टाटा नेक्सनले बढि जोड दिएको बताइन्छ ।

टाटा नेक्सन यात्रुको टाउको, गर्दन र चालकको छातीको लागि निकै सुरक्षित रहेको छ ।

माग ह्वात्तै बढ्यो

टाटा मोटर्सले पछिल्लो समय ‘थ्री स्टार’बाट ‘फाइभ स्टार’मा प्रवेश गर्न गरेको सुधारपछि बजारमा टाटा नेक्सनको माग बढेको दाबी गरेको छ । गत डिसेम्बरमा फाइभ स्टारमा प्रवेश गरेपछि नेक्सनको बिक्रीमा १६ प्रतिशतले बिक्री बढेको कम्पनीको दाबी छ ।

‘मासिक कारोबारको हिसाब हेर्दा १६ प्रतिशतले बिक्रीमा सुधार आएको छ,’ कम्पनीले उल्लेख गरेको छ । डिसेम्बर २०१८मा ४ हजार ३ सय ९३ युनिट बिक्री भएको टाटा नेक्सन जनवरी २०१९मा ५ हजार ९५ युनिट बिक्री भएको छ । त्यस्तै ५ हजार २ सय ६३ युनिट फेब्रुअरीमा बिक्री भएको टाटा मोटर्स कम्पनीले जानकारी दिएको छ । बढेको बिक्रीले समेत सुरक्षाको दृष्टिकोणले नेक्सन उच्च रहेको पुष्टि गर्ने कम्पनीको भनाइ छ । नेपाली बजारमा समेत विगत एक वर्षको अवधिमा एक हजारभन्दा बढि टाटा नेक्सन बिक्री भएको टाटा मोटर्सको आधिकारिक बिक्रेता सिप्रदी ट्रेडिङले जानकारी दिएको छ । टाटा नेक्सन कारलाई ग्राहकहरूले निकै रुचाएका कारण एक वर्षको अवधिमा एक हजार भन्दा बढि बिक्री भएको सिप्रदी ट्रेडिङका अधिकारीहरू बताउँछन् ।

यस्ता छन् विशेषता

टाटा मोटर्स कम्पनीको नयाँ डिजाइनमा आधारित चौथो उत्पादन 'टाटा नेक्सन' हो । कर्भ डिजाइन, पृथक स्टाइल र स्मार्ट विशेषताहरूका साथ यसले कम्प्याक्ट एसयूभी स्पेसमा छुट्टै पहिचान स्थापित गरेको छ ।

यसको फ्रन्ट र रेयर सिटमा पर्याप्त खाली ठाउँ छ । ड्राइभर सिटको उचाइ व्यवस्थापन, अटोमेटिक क्लाइमेट कन्ट्रोल लगायतका विशेषता यसमा रहेका छन् ।

टाटा नेक्सनको यात्रा निकै आरामदायी हुने गरेको र एसयूभीमा हुनुपर्ने सबै किसिमका सुविधा यसमा रहेका कम्पनीले दाबी गरेको छ ।

यो कार हेर्दा निकै आकर्षकका साथै १.२ लिटरको ३ सिलिण्डरयुक्त रेभोर्टन इञ्जिन रहेको बताइएको छ । टाटा नेक्सन सेप्टेम्बर २०१७ बाट बजारमा उपलब्ध हुन थालेको हो ।