धनगढी- कैलालीको धनगढीमा ७ सय ८९ जना महिलालाई आत्मरक्षा तालिम दिइएको छ । 

गुरुकुल सेक्युरिटी सर्विसेसको आयोजना तथा राष्ट्रिय गोजुरियो कराते दो संघको प्राविधिक र धनगढी उपमहानगरपालिकाको सहयोगमा ४ दिने आत्मरक्षा तालिम दिइएको हो ।

समाजमा घट्ने महिला तथा यौन हिंसाका घटनामा न्यूनीकरण गर्न महिलाहरूलाई आत्मरक्षा तालिम दिइएको हो । गुरुकुल सेक्युरिटीका अध्यक्ष तथा प्रशिक्षक प्रकाश कुमार चन्दले समाजमा दिनप्रति दिन बढिरहेको महिला तथा यौन हिंसा न्यूनीकरण गर्ने उद्देश्यले आत्मरक्षा तालिम दिएको बताए ।

पुरुषहरूसँग लड्नको लागि नभई कुविचार तथा गलत नियत भएका पुरुषबाट जोगिनलाई महिलाहरूलाई मार्सल आर्टस्‌को ज्ञान तथा सीप सिकाएको चन्दले जनाए । सिकेका ज्ञान र सीपले महिलाहरूको आत्मबलमा वृद्धि हुने समेत उनको भनाइ थियो ।

गत वर्ष धनगढीको क्षेत्रीय खेलमैदानमा पनि करीब १० हजार जना युवतीलाई आत्मरक्षाको तालिम दिइएको थियो ।