खाडीमा २० वर्ष चुहाएको पसिना माटोमा : न घर आफ्नो रह्यो, न श्रीमती, न त छोराछोरी नै !

बैशाख २६, २०७६

बुटवल –बीस वर्षसम्म वैदेशिक रोजगारीमा आफैंले कमाएर पठाएको ५० लाख रुपैयाँ न बच्यो, न श्रीमती र छोराछोरी नै आफ्नो साथमा रहे । यो पीडा कपिलवस्तु बुद्धभूमि नगरपालिका वडा नम्बर १ का वीरपुरका कृष्णप्रसाद भुसालको हो ।

साउदी अरबको ४८ डिग्री गर्मीमा रगत पसिना चुहाएर परिवारलाई सुखसँग पालौंला भनी २० वर्षसम्म गरेको मेहेनत बेक्कार भयो । अब घरमै बसेर केही गनुपर्छ भनी एक वर्ष अगाडि स्वदेश फर्किएका कृष्ण अहिले बिचल्लीमा छन् ।


ADVERTISEMENT

‘मासिक ८० हजारदेखि १ लाख २० हजार रुपैयाँसम्म कमाइ हुन्थ्यो । सबै रकम श्रीमती लक्ष्मीको नाममा पठाउने गर्थें,’ उनले भने ।

उनले पठाएको पैसाबाट वीरपुुरमा १५ वर्ष अगाडि १ तले घर बन्यो । त्यस्तै गोरुसिंगेमा ९ लाख ५० हजारमा ९ धुर घडेरी किनियो । त्यो पनि श्रीमतीकै नाममा पास गरिदिए ।

अन्य क्षेत्रमा पनि लगानी गनुपर्‍यो भन्ने श्रीमती लक्ष्मीकै आग्रहमा उनी टिप्पर किन्न राजी भए ।

पार्टनरसीपमा १० लाख खर्चिएर किनिएको टिप्पर श्रीमतीले आफूलाई फलाम नफाप्ने भनेपछि श्रीमतीकै आग्रह र सिफारिसमा छिमेकी प्रमोद पोखरेलको नाममा पास गरेको कृष्ण बताउँछन् ।

घरमै बसेर केही गर्नुपर्छ भनी स्वदेश आएका कृष्णलाई श्रीमतीले फेरि विदेश जान दबाब दिन थालिन् ।

‘म घर आएपछि त छोराछोरी पढाउने बेला भयो, तपाईं फेरि विदेश जानुस्, भारत भए पनि जानुस् भन्न थालिन्,’ कृष्णले गुनासो गरे ।

उनी विदेश जान मानेनन् । त्यसपछि श्रीमतीले आफूलाई अंशबण्डा, माना चामल र घरेलु हिंसाको मुद्दा दर्ता गरेको कृष्ण बताउँछन् । स्थिति यहाँसम्म आयो कि उनी आफ्नै घरमा प्रवेश गर्ने अवस्था रहेन ।

कृष्णले रुँदै लोकान्तरसँग भने, ‘विदेशमा कमाएको सबै पैसा एक रुपैयाँ पनि आफूसँग नराखेर पठाएँ, अहिले घरमा उल्टै मलाई भित्र समेत जान दिँदैनन् । घरमा छिरिस् भने ज्यान लिन्छु भन्छन् । छोराले पनि तलाईं मार्छु भन्छ । मलाई कस्ले दिन्छ, न्याय ?’ 

कृष्णले थपे, ‘तीन भाइको सामूहिकमा रहेको पाँच कट्ठा जग्गा पनि आफू र छोरा सुरजलाई समेत बाँडफाँड गनुपर्ने भनेकी छ । जेठा दाइ दिलिप शर्माले बनाउन लागेको घरमा समेत टोलका केटाहरूलाई प्रयोग गरी अवरोध पुुर्‍याउँदै आएकी छ ।

कृष्णले बस्न घर पनि पाएका छैनन् । विदेशबाट आएपछि सँगै नबसेको उनी बताउँछन् । आफू सँगै नबसे पनि श्रीमतीले गर्भ बोकेको थाहा पाएपछि आफूले सम्बन्धविच्छेदको मुद्दा हालेको कृष्णको दाबी छ । 

‘म घर आएपछि कसको गर्भ बोकेर बुटवलस्थित आम्दा हस्पिटलमा गएर बच्चा फालेर आई । म ऊ सँग बसेको पनि छैन । बच्चा फालेर आएपछि उल्टै मलाई रक्सी खाएर आउँदै शारीरिक सम्पर्क गरेर गर्भ रहेको आरोप लगाएकी छे,’ उनले भने । 

कृष्णले श्रीमतीविरुद्ध सम्बन्धविच्छेद र जालसाझीको मुुद्दा हालेका छन् । श्रीमती अर्कैसँग लागेर आफूलाई मार्नेसम्मको योजना बनाउने थालेकाले असुरक्षित भएको भन्दै उनले सुरक्षाका लागि प्रहरीमा निवेदन समेत दिएका छन् । 

श्रीमतीले नै कृष्णको जीवन तहसनहस बनाएको छिमेकी पनि बताउँछन् । छिमेकी सृजना भुसालले भनिन्, ‘घरमा महिला बिग्रिँदा कस्तो अवस्था हुन्छ भन्ने यो उदाहरण बन्न पुगेको छ ।’

जनप्रतिनिधिहरू समेत आफ्नो परिवार बिगार्न लागि परेको कृष्णको आरोप छ । तर वडाध्यक्ष तिलकबहादुर बस्नेत भने आफूहरूले दुई पक्षबीच सहमति गराएर मिलाउने प्रयास गरिरहेको बताउँछन् ।

‘लक्ष्मीले छोराको नाममा पनि जग्गा हुनुपर्ने बताउँदै आएकी थिइन्, हामीले सहमतिमा तीन जनाकै नाममा सामूहिक रूपमा राखिदिने निर्णय गरेको छौं,’ उनले भने ।

कृष्णका १९ वर्षिय छोरा सुरज र १२ वर्षिया छोरी सृजना छन् । उनीहरू भने बुवाले नै आमालाई दु:ख दिएको दाबी गर्छन् ।

लक्ष्मीले पनि अब आफू कृष्णसँग बस्न नसक्ने बताइन् । कृष्णले पठाएको पैसा आफूहरूले हिनामिना नगरेको उनको जिकिर छ । 

‘मलाई कृष्णले नभएको आरोप लगाए । पैसा हिनामिना गरेको बताए । अब म सँगै बस्न सक्दिनँ । आ–आफ्नो सुर गर्नुको विकल्प छैन,’ उनले भनिन् ।

कृष्णले आफूसँग झगडा मात्र गर्ने गरेको जिकिर गर्दै उनले थपिन्, ‘अनि कसरी सँगै बस्न सकिन्छ ?’

वैदेशिक रोजगारीका कारण परिवारहरू कसरी बिग्रिँदै छन्, यो घटना त्यसको एउटा उदाहरण बनेको छ ।

बैशाख २६, २०७६ मा प्रकाशित

प्रतिक्रिया दिनुहोस