दाउमा प्रेमियर लीग उपाधि : म्यानचेस्टर सिटी र लिभरपूलबीच कडा भिडन्त

बैशाख २९, २०७६

काठमाडौं – यस सीजनको इंग्लिश प्रेमियर लीगको उपाधि जित्नका लागि म्यानचेस्टर सिटी र लिभरपूलले अन्तिम खेलमा कुनै पनि हालतमा जित्नुपर्ने स्थिति छ ।

आइतवार सिटीको प्रतिस्पर्धा ब्राइटन यान्ड होभ आल्बियोनसँग छ भने लिभरपूल वुल्भ्ससँग भिड्दैछ । 


ADVERTISEMENT

आजको खेलमा बराबरी वा हार दुवैले सिटीलाई उपाधिबाट वञ्चित गर्नेछ । लिभरपूलका लागि चाहिँ जीत मात्र पर्याप्त हुने छैन, उसले सिटी चिप्लिने अपेक्षा पनि गर्नुपरेको छ । 

सिटी ९५ अंकका साथ पहिलो स्थानमा छ भने लिभरपूल उसभन्दा जम्मा एक कम अंक ९४ ल्याएर दोस्रो स्थानमा छ । पेप ग्वार्डिओलाको प्रशिक्षणमा रहेको सिटीले लिभरपूललाई उपाधि दिलाउनका लागि फितलो खेल देखाउने अपेक्षा कसैले पनि गरेको छैन । 

सिटीले प्रेमियर लीगमा यसअघिका लगातार १३ खेलमा जीत हासिल गरेको छ र आज १४औं खेल पनि जित्ने अपेक्षा गरिरहेको छ । लिभरपूलले पनि लगातार आठ खेल जितेको छ र वुल्भ्सलाई जितेर त्यसलाई नौ जीत बनाउने दाउमा छ । त्यसो भयो भने सिटीले ९८ अंकका साथ उपाधि जित्छ भने लिभरपूलले ९७ अंक ल्याएर दोस्रो स्थान हासिल गर्नेछ । 

यो अंक भनेको प्रेमियर लीगको इतिहासमा दोस्रो तथा तेस्रो सबभन्दा धेरै अंक हो । १०० अंकका रूपमा यसभन्दा बढी अंक अघिल्लो सीजनमा सिटीले नै ल्याएको थियो र ग्वार्डिओलालाई पहिलोपटक प्रेमियर लीग उपाधि दिलाएको थियो । 

ट्रफी बाँड्ने स्थिति आउँथ्यो भने त्यसका लागि यही सीजन नै उपयुक्त हुन्थ्यो किनकि सिटी र लिभरपूल दुवै उत्तिकै उम्दा छन् । तर वास्तविकता भन्नुपर्दा यति कडा प्रतिस्पर्धापछि दोस्रो हुनु भनेको तीतो औषधि निल्नु जत्तिकै हो । 

‘हामीले अहिलेसम्म के ग–यौं भन्ने विषयका आधारमा म आफ्नो धारणा परिवर्तन गर्दिनँ तर हाम्रो मूल्यांकन भइरहेको छ भन्ने मलाई थाहा छ । हामीले जसरी भए पनि जित्नैपर्छ,’ ग्वार्डिओलाले ब्राइटन भ्रमणमा जाने तयारीका क्रममा भने । ब्राइटनले सिटीलाई अप्ठ्यारो पार्ने सम्भावना छ । 

युर्गेन क्लोपको प्रशिक्षणमा रहेको लिभरपूल अघिल्लो वर्ष सिटीभन्दा २५ अंकले पछाडि थियो तर अहिले टीमले त्यो खाडल पुरिसकेको छ र यदाकदा सिटीलाई पनि पछि पारेको छ । सिटीले यस सीजनमा चार खेल हार्दा लिभरपूलले जम्मा एउटा खेल हारेको छ । जनवरी महिनामा लिभरपूल सिटीभन्दा सात अंक अगाडि थियो तर त्यसपछि भने ग्वार्डिओलाले आक्रामक रणनीति अपनाएर टीमलाई अघि बढाए अनि टीमको धुरी पनि निकै बलियो छ । 

सिटी बलियो टीम हो भन्ने कुराको उदाहरण सोमवारको खेल नै हो । उक्त खेलमा लेस्टर सिटीले एतिहाद स्टेडियममा सिटीलाई अल्झाइराखेको बेलामा कप्तान भिन्सेन्ट कोम्पनीले ३० मिटर टाढाबाट हानेको किक गोलमा परिणत भएर उपाधि छिनोफानो अन्तिम दिनमा टुंगिने अवस्थामा लगे । 

चार खेलमध्ये उनीहरूले तीनवटामा १–० को जीत हासिल पारे । लिभरपूलको बलियो डिफेन्सका बारेमा जति कुरा भए पनि सिटीले पछिल्ला १३ खेलमा जम्मा तीनवटा गोल मात्र खाएको छ र दश वर्षपछि लीग प्रतिरक्षा गर्ने पहिलो क्लब बन्न लागेको छ । यसअघि म्यानचेस्टर युनाइटेडले त्यो उपलब्धि हासिल गरेको थियो ।

लिभरपूलका कप्तान जोर्डन हेन्डरसनले पहिलोपटक प्रेमियर लीग जित्नका लागि अन्तिम दिन आफ्नो टोलीले कुनै चमत्कारकै अपेक्षा गरिरहेको बताएका छन् । 

तर बार्सिलोनाले गरेको तीन गोलको जवाफमा चार गोल फर्काएर च्याम्पियन्स लीगको फाइनलमा पुगेको लिभरपूलले प्रेमियर लीग उपाधि जित्न सक्दैन भनी दाबी गर्नु मूर्खता हुनेछ । उसमा उपाधिको तिर्खा विगत २९ वर्षदेखि छ । 

‘सिटी निकै राम्रो टीम हो र हामी पनि कम छैनौं । हामीहरूले अन्तिमसम्म कडा प्रतिस्पर्धा गरेका छौं,’ हेन्डरसनले भने । ‘जसले उपाधि जिते पनि हकदार नै ठहरिने हो । हाम्रो दृष्टिकोणबाट हेर्दा हामीले यसभन्दा राम्रो खेल देखाउने ठाउँ थिएन ।’

प्रेमियर लीग युग शुरू भएदेखि उपाधिको छिनोफानो अन्तिम दिनमा हुन लागेको यो आठौं अवसर हो ।

रोयटर्सबाट 

बैशाख २९, २०७६ मा प्रकाशित

प्रतिक्रिया दिनुहोस