चितवन- रामपुरमा निर्माण गर्न थालिएको गौतमबुद्ध अन्तर्राष्ट्रिय क्रिकेट रंगशालामा पुसबाट प्रतियोगिता गर्न सकिने गरी कामलाई अघि बढाइएको छ । 

धुर्मुस–सुन्तली फाउण्डेशनले माघ १६ गते भरतपुर महानगरपालिकासँग रंगशाला निर्माण गर्ने सम्झौता गरेको थियो । फाउण्डेशनका अध्यक्ष सीताराम कट्टेल (धुर्मुस)ले आइतवार चितवनमा पत्रकारहरूसँग कुराकानी गर्दै रकम उठ्न सकेमा पुस महिनासम्ममा मैदानको काम सम्पन्न गरी खेल खेल्न सकिने बताए । कामलाई तीव्रता दिन जेठ मसान्तसम्ममा ३० करोड रुपैयाँ आवश्यक पर्ने भन्दै चितवन जिल्लावासी आर्थिक संकलन अभियानमा जुट्नुपर्नेमा जोड दिए । 

हालसम्म ६ करोड ५० लाख रुपैयाँ मात्र बोलिएको छ । सबै रकम उठिसकेको छैन । भदौ महिनामा औपचारिक शिलान्यास गर्नका लागि आवश्यक कच्चापदार्थ जम्मा गर्ने काम भइरहेको छ । रंगशाला क्षेत्रलाई टिनले बार्ने काम, निर्माण गर्दा आवश्यक पर्ने कार्यालय निर्माण, कर्मचारी आवास गृह, गोदाम घर, सुरक्षाकर्मी घरलगायत आवश्यक संरचना निर्माण भइसकेको उनले बताए । 

मैदान बनाउनका लागि काठमाडौंका दुई स्थानबाट परीक्षण गरी माटो ल्याइएको छ भने तनहुँबाट पनि माटो ल्याउने तयारी भइरहेको उनले बताए । मैदानसँगै दुबो रोप्नका लागि ब्याडमा दुबो हुर्काउने काम शुरू गरिएको कट्टेलले बताए । पहिलो चरणमा मैदान तयार गरी प्याराफिट र अन्य काम अघि बढाउने तयारी गरिएको छ । 

अन्तर्राष्ट्रियस्तरको र पूर्वअभ्यासका लागि एउटा/एउटा खेलमैदान निर्माण गरिने कट्टेलले बताए । गुरुयोजना तयार गरी नक्सांकनको काम तीव्र गतिमा अघि बढाइएको उनले बताए । वातावरणीय प्रभाव मूल्यांकनको काम पनि अघि बढाइएको छ । 

क्रिकेटबाहेक अन्य खेलको विस्तृत अध्ययन प्रतिवेदन अन्तिम चरणमा पुगेको छ भने क्रिकेटको प्रतिवेदन निर्माणको काम भइरहेको कट्टेलले बताए । कट्टेलका अनुसार आउँदो ३० वर्षपछि हुने प्रविधि अहिले नै प्रयोग गरेर नक्सांकनको काम भइरहेको छ । यसका लागि नेपालीसँगै विदेशी विज्ञहरूले पनि काम गरिरहेका छन् । 

कट्टेलले आर्थिक सहयोगका लागि देशभर अभियान शुरु हुने क्रममा रहेको बताउँदै कतिपय जिल्लामा सहयोग समिति बनेर रकम संकलन हुन थालेको बताए । चितवनमा जिल्ला, महानगर, नगर, गाउँपालिका र वडास्तरीय सँगै विभिन्न सरोकारवाला निकायको छुट्टाछुट्टै समिति निर्माण गरी आर्थिक संकलन अभियानलाई तीव्रता दिइने उनले बताए ।

यससँगै सबै जिल्लामा समिति निर्माण गरी रंगशालाको अपनत्व लिने गरी आर्थिक सहयोग अभियानलाई तीव्रता दिइने उनले बताए । बहुउपोगी रंगशाला निर्माणमा तीन अर्ब रुपैयाँ लाग्ने धुर्मुस–सुन्तली फाउण्डेशनले जनाएको छ । अहिले बन्न लागेको रंगशालामा ३५ खेल खेलाउन सकिनेछ । त्रिभुवन विश्वविद्यालयको नाममा रामपुरमा रहेको २० बिघा ६ कट्ठा जग्गामा रंगशाला निर्माण गर्न लागिएको हो । रंगशाला लाई खेलकूद विश्वविद्यालयका रूपमा विकास गर्ने लक्ष्य लिइएको छ ।