राष्ट्र बैंकमा प्रवक्ताको जिम्मेवारी निरौलालाई

बैशाख २९, २०७६

काठमाडौं– नेपाल राष्ट्र बैंकमा रिक्त रहेको प्रवक्ताको जिम्मेवारी लक्ष्मी प्रपन्न निरौलालाई दिइएको छ । करिब तीन दशक लामो बैंकिङ अनुभव समेटेका निरौलालाई राष्ट्र बैंकको प्रवक्ताको जिम्मेवारी दिइएको हो ।

उनले २०४६ सालमा अधिकृत तीतृय श्रेणी सहायक निर्देशकबाट नेपाल राष्ट्र बैंकमा प्रवेश गरेका थिए । 


ADVERTISEMENT

अर्थशास्त्र र जनप्रशासन विषयमा स्नातकोत्तर गरेका निरौलाले यसअघि राष्ट्र बैंकका महत्वपूर्ण विभागहरुको जिम्मेवारी सम्हालिसकेका छन् ।

यसअघि उनले राष्ट्र बैंकमा बैंक सुपरिवेक्षण विभाग, विकास बैंक सुपरिवेक्षण विभाग, सामान्य सेवा विभाग र मुद्रा व्यवस्थापन विभाग सहितका चार वटा विभाग प्रमुखको हैसियतले जिम्मेवारी निभाइसकेका छन् ।

राष्ट्र बैंकबाहेक उनले नेपाल बैंक लिमिटेडको व्यवस्थापन समूहमा काम गरेको अनुभव समेत लिइसकेका छन् ।
त्यस्तै नेपाल राष्ट्र बैंकले नियन्त्रणमा लिएका बैंकहरु बैंक अफ काठमाडौं र एनसिसि बैंकको  व्यवस्थापन समितिको संयोजक भएर भुमिका निभाएको अनुभव समेत निरौलासँग छ ।

प्रवक्तामा नियुक्त भएसँगै उनले बैंकिङ तथा अर्थव्यवस्थासँग सम्बन्धित  नीति तथा निर्णयहरुका विषयमा सर्वसाधारणको जानकारी लागि सञ्चार जगतसँगै बसेर जिम्मेवारी निभाउने बताए ।

‘बैंकिङ र अर्थव्यवस्थासँग सम्बन्धित र राष्ट्र बैंकका क्षेत्राधिकार भित्र पर्ने निर्णयहरु र नीतिहरुका विषयमा सर्वसाधारणको जानकारीका लागि मिडियासँगै बसेर काम गर्ने गरी जिम्मेवारी निभाउने छु,’ उनले भने ।

यसअघि राष्ट्र बैंकको प्रवक्तामा नारायणप्रसाद पौडेल थिए ।
 

बैशाख २९, २०७६ मा प्रकाशित

प्रतिक्रिया दिनुहोस

ताजा समाचार