फेरियो नयाँ बसपार्कको मुहार

बैशाख ३१, २०७६

काठमाडौं- केही वर्ष अगाडिसम्म अस्तव्यस्त रहेको नयाँ बसपार्क अहिले राम्रोसँग सञ्चालनमा छ । 

२०५६ सालबाट सञ्चालनमा आएको बसपार्क २०७२ साल साउन २५ गतेबाट उद्यमी दिपक कुँवर अध्यक्ष रहेको लोत्से बहुउद्देश्य सहकारी संस्थाले सञ्चालन गर्दै आएको छ । केही समय अगाडि सम्म पानी ट्यांकरको पार्किङ गर्ने ठाउँ थियो- बसपार्क । 


ADVERTISEMENT

बसपार्क व्यवस्थापनको जिम्मा पाएको संस्थाले बसपार्कभित्र बनेका करीब ६ सय अवैध टहरासमेत भत्काएको छ ।

बसपार्कभित्र रहेका होटललाई मापदण्डमा ल्याइएको छ भने बसपार्कभित्र सञ्चालनमा रहेका रक्सीपसल र भट्टीपूर्ण रूपले हटाइएको छ ।

‘एक सटर बराबर ४ लाखसम्म भाडा दिन्छु रक्सी पसल चलाउनदिनु पर्‍यो भन्दै आएका पनि थिए तर मैले फिर्ता पठाइदिएँ,' कुँवरले भने, ‘सबै कुरा पैसा मात्र होइन मेरो चाहना बसपार्कलाई अन्तर्राष्ट्रिय स्तरको नमूना बसपार्क बनाउनु हो । विचौलिया हुने छैनन् ।’

यसअघि बिचौलियाका कारणबाट सवारीधनी र यात्रु मर्कामा थिए । हाल लोत्सेले बस व्यवसायीसँग सीधा सम्झौता गरेर बिना बिचौलिया बसको टिकट काट्न व्यवस्था मिलाएको छ । जसले गर्दा अहिले व्यावसायीले यात्रुले तिरेको पूरा भाडा पाउँदै आएकाछन् भने बसपार्कमा बिचौलिया छैनन् । टिकट काउन्टरमा खटिने कर्मचारीलाई समेत तोकिएको ड्रेस र परिचयपत्र अनिवार्य गरिएको कुँवर बताउँछन् ।

बसपार्कको शौचालय सफा र व्यवस्थित बनाउँदै ग्रिनरीको समेत निर्माण भएको छ । खाना, खाजा र टिकटको सबै काम व्यवस्थित हुँदै गइरहेको छ । 

यात्रुको सुरक्षालाई ध्यानमा राख्दै नयाँ बसपार्क छिर्ने सडकमा ढोका बनाइ केही समयपछि राति १२ बजेपछि बसपार्कभित्र प्रवेशमा समेत रोक लगाइने कुँवरले बताए । लामो र छोटो दूरीका सवारी साधनको अवस्था जाँच गर्न र सवारी साधनको खराबीबाट हुने दुर्घटना न्यूनीकरणका लागि लोत्सले सिप्रदीअटो प्रालिसँग मिलेर निःशुल्क सवारी जाँचको व्यवस्था गरेको छ ।

यात्रु, सवारीचालक र परिचालकको स्वास्थ्यलाई समेत ध्यानमा राखेर ग्राण्डी इन्टरनेसनल हस्पिटलसँगको सहकार्यमा २४ सै घण्टा निशुल्क प्राथमिक उपचार कक्ष बनाइएको छ । जहाँ २ जना स्टाफ २४ सै घण्टा सेवा दिँदै आइरहेका हुन्छन् । एउटा एम्बुलेन्स समेत त्यहाँ राखिएको छ । सोलार लाइट, पेट्रोल पम्प, अपांगमैत्री शौचालय, हेल्प–डेस्क, यात्रु प्रतिक्षालय लगायतका केही अत्याधुनिक पूर्वधार थप्ने काम भइरहेको कुँवरले जानकारी दिए ।

ई-टिकेटको समेत व्यवस्थाको तयारी थालिएको जनाउँदै उनले नेपाल सरकारले तोकेको लम्बाई चौडाइ र उचाइको व्यापारिक भवनको समेत निर्माण सम्पन्न भइसकेको उनी बताउँछन् । बसपार्कमा करीब २० हजार यात्रुले आवतजावत गर्छन् ।

चार सय जनाभन्दा बढी मानिसले बसपार्कमा प्रत्यक्ष रोजगारी पाइरहेका छन् । नेपाल सरकारको सिण्डीकेट अन्त्य गर्ने योजनाअनुसार अव्यवस्थित तरिकाले खोलिएका गौशाला, सुन्धारा, चावहिल, कलंकी लगायतका टिकट काउन्टरसमेत ट्राफिक प्रहरी महाशाखा, यातायात महासंघ र लोत्सेको सहकार्यमा हटाइएको छ ।
 

बैशाख ३१, २०७६ मा प्रकाशित

प्रतिक्रिया दिनुहोस