बंगालमा भएको हिंसामा भाजपा र टीएमसीबीच आरोप प्रत्यारोप

जेठ १, २०७६

काठमाडौं – भारतको पश्चिम बंगालको कोलकातामा भारतीय जनता पार्टी (भाजपा) का राष्ट्रिय अध्यक्ष अमित शाहको रोड शोका क्रममा भएको हिंसाले देशै तताएको छ । मंगलवार उक्त हिंसा भएको थियो । 

चुनावी वातावरणमा कोलकाताको सडकमा उत्पात मच्चिएको थियो र अहिले सत्ताधारी तृणमूल कांग्रेस (टीएमसी) ले यससम्बन्धी केही भिडियो सार्वजनिक गरेको छ । भिडियोमा केही मानिस आगजनी गरिरहेका देखिन्छन् । 


ADVERTISEMENT

टीमएसीले भिडियो जारी गरेपछि भाजपाले पनि भिडियो जारी गरेर टीएमसीमाथि आरोप लगाएको छ । 

भिडियोमा भाजपाको झण्डा राखिएका केही गाडी सडकमा जाँदै गरेको अनि गेरु रंगको कमिज लगाएका, हातमा भाजपाको झण्डा बोकेका र शिरमा गेरु वस्त्र बाँधेका केही मानिस सडकमा उभिएका वाहनमा क्षति पुर्‍याइरहेको देखिन्छ । तीमध्ये केहीको हातमा लट्ठी छ भने केही चाहिँ ढुंगा हानिरहेका देखिन्छन् । सडकको किनार उभिएका वाहनमा आगो लागेको पनि देखिन्छ ।

भाजपाको सूचना प्रविधि सेलका प्रमुख अमित मालवीयले पनि भिडियो जारी गरेर टीएमसीमाथि अमित शाहको रोड शोमा हिंसा फैलाएको आरोप लगाए । अमित शाहको रोड शोमा टीएमसी समर्थकहरूले बाधा गर्दा हालत बिग्रिएको उनले लेखे । 

आइतवार हुन लागेको लोकसभा चुनावको अन्तिम चरणको मतदानअघि अमित शाहले कोलकातामा रोड शो गरेका थिए । रोड शोमा भाजपा कार्यकर्ताहरूले नाच्दै गाउँदै मोदी मोदीको नारा लगाए । 

उनीहरूले जय श्रीरामको नारा पनि लगाए । रोड शो सकिने बेलामा भाजपा र टीएमसीका कार्यकर्ता भिड्न थाले । यस क्रममा आगजनी पनि गरियो र ईश्वरचन्द्र विद्यासागरको मूर्ति पनि फुटाइयो ।

तृणमूल कांग्रेसले लोकतन्त्रलाई ध्वस्त पार्न खोजेको आरोप भाजपाले लगाएको छ भने टीएमसीले भाजपा कार्यकर्तामाथि उत्पात मच्चाएको आरोप लगाएको छ ।

एजेन्सी
 

जेठ १, २०७६ मा प्रकाशित

प्रतिक्रिया दिनुहोस