जेठ ६ गतेदेखि सशक्त आन्दोलन गर्ने कांग्रेसको निर्णय, विवादित विधेयक फिर्ता गर्न माग

जेठ १, २०७६

काठमाडौं – प्रमुख प्रतिपक्षी दल नेपाली कांग्रेसले सरकारले सदनमा प्रस्तुत गरेका ३ वटा विवादास्पद विधेयक फिर्ता नलिए सदन अवरुद्ध गर्न बाध्य हुने बताएको छ ।

बुधवार बिहान बसेको कांग्रेस संसदीय दलको बैठकले प्रस्तुत विधेयकविरुद्ध जेठ ६ गतेदेखि सशक्त आन्दोलन गर्ने निर्णय गरेको हो । 


ADVERTISEMENT

प्रमुख सचेतक बालकृष्ण खाणले नेपालको संविधानको प्रतिकूल हुने गरी राष्ट्रिय सुरक्षा परिषद् र नेपाली सेनालाई पन्छाएर प्रधानमन्त्रीको एकल निर्णयबाट सेना परिचालन गर्न खोजेको आरोप लगाए । 

बैठकले नेपाल सरकारले संसदमा प्रस्तुत गरेको ‘राष्ट्रिय सुरक्षा परिषद्को काम, कर्तव्य र अधिकार सम्बन्धमा व्यवस्था गर्न बनेको विधेयक, २०७५’को दफा ६ को उपदफा ९३० मा ‘तत्काल परिषद्को बैठक बस्न सम्भव नभएमा अध्यक्षले सेना परिचालनका लागि नेपाल सरकार समक्ष सिफारिस गर्न सक्नेछ’ भन्ने प्रावधानले प्रधानमन्त्रीलाई थप निरंकुश बनाउन खोजेको आरोप लगाएको छ ।

कांग्रेस संसदीय दलले नेपाल मिडिया काउन्सिल सम्बन्धी कानूनलाई संशोधन र एकीकरण गर्न बनेको विधेयकले संविधानको प्रावधान र भावनालाई ठेस पुर्‍याउने र प्रेस स्वतन्त्रतालाई कुण्ठित गर्न खोजेको आरोप लगाएको छ ।

बैठकमा राष्ट्रिय मानव अधिकार आयोग ऐन २०६८ लाई संशोधन गर्न बनेको विधेयकले नेपाली जनताको मानव अधिकारको संरक्षण र रक्षा गर्ने मानव अधिकार आयोगलाई सवल, सक्षम बनाउनुपर्नेमा सरकारले निरीह, कमजोर र निष्प्रभावी गर्ने कोसिश गरेको आरोप लगाइएको छ ।

सरकारले ३ वटै विधेयक फिर्ता नलिए कडाभन्दा कडा आन्दोलनका कार्यक्रमहरू घोषणा गर्ने कांग्रेस संसदीय दलले बताएको छ ।

संसदीय दलको बैठकपछि लोकान्तरसँग कुरा गर्दै कांग्रेस नेतृ डीला संग्रौलाले भनिन्, ‘मिडिया काउन्सिल विधेयक, राष्ट्रिय सुरक्षा परिषद्लाई प्रधानमन्त्री मातहत ल्याउने तयारीस्वरूप ल्याइएको अर्काे विधेयक र मानवअधिकार आयोग सम्बन्धि विधेयक फिर्ता नलिए जेठ ६ गतेबाट सशक्त आन्दोलन गरिने छ ।’

जेठ १, २०७६ मा प्रकाशित

प्रतिक्रिया दिनुहोस