काठमाडौं – भारतको लोकसभा चुनावमा एक चरणको मतदान बाँकी नै छ तर कांग्रेसले बहुमत पाउने आत्मविश्वास देखाएको छैन । गठबन्धनमा सरकार बनाउने र गठबन्धनको प्रधानमन्त्री पद पाइएन भने पनि चित्त नदुखाउने कांग्रेसको भनाइ छ ।

कांग्रेसका वरिष्ठ नेता गुलाम नबी आजादले पार्टीको एक मात्र उद्देश्य एनडीएलाई केन्द्रमा फेरि सरकार बनाउनबाट रोक्नु रहेको बताए । 

आजादले भने, ‘हामीहरूले आफ्नो अडान स्पष्ट पारिसकेका छौं । कांग्रेसको पक्षमा सहमति बनेमा हामी नेतृत्व स्वीकार गर्छौं । तर हाम्रो लक्ष्य सधैंभरि एनडीएको सरकारलाई सत्तामा आउनबाट रोक्नु नै हो । हामीहरू सर्वसम्मतिबाट लिइएको फैसलालाई मान्छौं ।’

आजादको यो भनाइले कांग्रेस चुनावको परिणामका विषयमा खासै उत्साहित नभएको देखाउँछ । भाजपालाई सत्तामा आउनबाट रोक्नका लागि पार्टी ठूलै त्याग गर्न पनि तयार रहेको संकेत यसबाट पाइन्छ ।

कांग्रेस महासचिव आजादले भने, ‘हामीलाई प्रधानमन्त्री पदको प्रस्ताव नगरिएसम्म यस विषयमा केही पनि भन्दैनौं र कुनै पनि जिम्मेवारी सम्हाल्नमा आपत्ति जनाउँदैनौं ।’

गृहमन्त्री राजनाथ सिंहले विपक्षीहरूलाई चुनौती दिँदै आमचुनावमा जीतको विश्वास भएमा प्रधानमन्त्री पदको उम्मेदवार घोषणा गर्न भनेका थिए । 

केही दिनअघि कांग्रेसका वरिष्ठ नेता कपिल सिब्बलले आफ्नो दलले बहुमत ल्याउने सम्भावना नदेखेको बताएका थिए । एक अन्तर्वार्तामा उनले कांग्रेसले आफ्नै बलबुतामा बहुमत ल्याउने चान्स छैन तर कांग्रेस नेतृत्वको यूपीए गठबन्धनको सरकार बन्न सक्छ । 

एजेन्सी