बुटवल- रूपन्देहीको सालझण्डीबाट बाग्लुङको ढोरपाटन जोड्ने सडकखण्ड अन्तर्गत पाल्पाको ढुङग्रेदेखि तारीफाँटसम्मको सडकखण्डको ठेकेदार कम्पनीले समयमा काम नगर्दा स्थानीयले सास्ती बेहोर्न बाध्य भएका छन् ।

सालझण्डीदेखि तारीफाँटसम्मको १७ किलोमिटर सडकमध्ये झण्डै ८ किलोमिटर सडक ठेकेदार कम्पनीले ग्राभेल नगर्दा स्थानीयहरू ‘घाम लाग्दा धूलो पानी पर्दा हिलो’ले आजित बनेका छन् । 

ग्राभेल गर्न बाँकी सडक पाल्पाको रैनादेवी छहर गाउँपालिकाको वडा नम्बर ७ र ८ मा पर्छ । स्थानीय दिलबहादुर गाहाले ठेकेदार कम्पनीले सडक निर्माणमा ढिलासुस्ती गर्दा आफूहरूले ठूलो सास्ती बेर्होन परेको बताए । उनले भने, 'हामी स्थानीहरूले पटक–पटक अनरोध गर्‍यौं । ठेकेदार कम्पनीले कहिलेकाहिँ आउँछ । निर्माण सामग्री पनि यहाँ छैनन् । हामीलाई पर्नु सास्ती पर्‍यो ।’

१ सय ९५ किलोमिटरको यो सडकको ट्र्याक खोलिसकेको छ । यो सडक विभिन्न ठेकेदारहरू पार्ट/पार्टको विभिन्न ठेकेदार कम्पनीहरूले ठेक्का लिएका छन् । यो खण्डको बिटी जयबाबा जेभी कन्ट्रक्सन प्रालिले ठेक्का लिएको छ । यो सडक निर्माणको लागि १५ करोड रुपैयाँ बजेट चालु आर्थिक वर्षमा परेको छ । 

यो सडक भएर दैनिक १ सय ५० भन्दा बढी सवारी साधान पाल्पा, अर्घाखाँची हुँदै ढोरपाटनसम्म पुग्छन् । सडक धुलाम्य र हिलाम्य हुँदा विद्यालय जाने विद्यार्थी र पैदल यात्रु धूलोले चिन्न नसकिने हुन्छन् । 

२०७२ सालदेखि निर्माण थालेर २०७४ सम्म ग्राभेल गरीसक्ने सम्झौता भएपनि ठेकेदारले दुई वर्ष ढिला हुँदासम्म निर्माण कार्यलाई प्रभावकारी नबनाउँदा स्थानीयहरूले समस्या भोग्न बाध्य भएको गाहाको भनाइ छ । 

बिटी जयबाबा जेभी कन्ट्रक्सन प्रालिका सुपरभाइजर बिशाल पौडेलले आफूहरूले भुक्तानी नपाउँदा काम गर्न नसकेको बताए । ‘हामीलाई रकम भुक्तानी भएको छैन । भुक्तानी भएपछि कामलाई तीव्रता दिन्छौं,’ उनले भने । आफूहरूलाई तत्काल २० लाख रुपैयाँ भुक्तानी दिए जेठ महिनाभित्र ग्राभेल गर्न बाँकी सडक वर्षात् अगावै पूरा गर्न सकिने पौडेलले बताए । अर्का स्थानीय विष्णु बहादुर सिंजालीले सडकको धूलो र खाल्डाखुल्डीले रैनादेवी छहराबासीलाई समस्या परेको बताए । हिलो र खाल्डामा पानी जमेर सडक आहलमा परिर्वतन हुँदासमेत ठेकेदार कम्पनीको ध्यान नपुगेको सिंजालीले बताए । अर्का लोकेन्द्र सिंजालीले सडकले सुविधाभन्दा सास्ती थपेको बताए ।