म्यानचेस्टर सिटीमाथि च्याम्पियन्स लीगमा प्रतिबन्ध लगाइने सम्भावना

जेठ २, २०७६

काठमाडौं – बेलायती फूटबल क्लब म्यानचेस्टर सिटीलाई फाइनान्सियल फेयर प्ले नियमको उल्लंघन गरेको आरोपमा दोषी ठहर गरिएको छ ।

प्रेमियर लीग जितेको सिटीले च्याम्पियन्स लीग खेल्न नपाउने सम्भावना बढेको छ । 


ADVERTISEMENT

सिटीले नियम भंग गरेको निष्कर्ष आफ्नो अनुसन्धान इकाइले निकालेको यूईएफएले बिहीवार जनायो । 

यूईएफएले अन्तिम फैसला नआउन्जेल थप टिप्पणी नगर्ने जनाएको छ । अन्तिम फैसला केही हप्तामै आउने अपेक्षा गरिएको छ । 

तर सिटीलाई प्रतिबन्ध लगाउनका लागि सिफारिश गरिने सम्भावना प्रबल रहेको बताइएको छ । 

सन् २०१८ को नोभेम्बर महिना र सन् २०१९ को मार्च महिनामा फूटबल लीक्सले गरेको खुलासामा सिटीले अनेकौं नियम भंग गरेको आरोप लगाइएको छ । त्यसपछि यूईएफएले यसमाथि कारवाही चलाएको थियो । 

सिटीले प्रायोजनबाट गरेको कमाइको बहानामा लाखौं पाउन्ड लुकाएको आरोप लगाइएको छ । 

सिटीले आफूलाई दोषी ठहर गरिएको कुरालाई प्रतिवाद गरेको छ । उसले ट्विटर अकाउन्टमा पोस्ट गर्दै लेख्यो, ‘स्वतन्त्र न्यायिक निकायले यस विषयमा अनुसन्धान गरेमा सकारात्मक परिणाम आउने विषयमा म्यानचेस्टर सिटी विश्वस्त छ ।’

सिटीमाथि प्रतिबन्ध लाग्यो भने पनि उसले यसविरुद्ध पुनरावेदन गर्ने अधिकार राख्छ । 

त्यसपछि यो मुद्दा स्विट्जरल्यान्डस्थित लाउजेनको खेलकुद अदालतमा पुनरावेदनका लागि पुग्छ । उक्त अदालतले सन् २०१९ को अन्त्यसम्ममा बल्ल अन्तिम फैसला गर्न सक्छ ।

कानूनी प्रक्रिया चल्दै गर्दा प्रतिबन्ध थाती राखिन्छ र सिटीले अर्को सीजनको च्याम्पियन्स लीगमा सहभागी हुन पाउँछ ।

एजेन्सी

जेठ २, २०७६ मा प्रकाशित

प्रतिक्रिया दिनुहोस