बुटवल- राष्ट्रपति विद्यादेवी भण्डारीले लुम्बिनीलाई विकास गर्न लुम्बिनी गुरुयोजना छिटो सम्पन्न गर्नुपर्ने बताएकी छन् । उनले लुम्बिनी गुरुयोजना छिटो गर्न सरकारको ध्यानाकर्षण गराइन् । 

२५६३ औं बुद्ध जयन्तीको अवसरमा शनिवार भगवान गौतम बुद्धको जन्मस्थल लुम्बिनीमा आयोजित कार्यक्रमलाई सम्बोधन गर्दै राष्ट्रपतिले भनिन्, 'एकीकृत लुम्बिनी गुरुयोजना छिटो सफल पार्न सरकारको ध्यान जाओस् । ३० वर्ष पूरा हुँदा समेत लुम्बिनी गुरुयोजना पूरा हुन सकेको छैन । अहिलेसम्म लुम्बिनी गुरुयोजना ८० प्रतिशत काम भएको छ । कपिलवस्तुको तिलौराकोट, नवलपरासीको रामग्राम देवदहलाई जोडेर लुम्बिनीमा जोडिनुपर्छ ।' 

लुम्बिनी गुरुयोजना पूरा नहुँदा विश्वभरका मानिसहरूलाई जोड्न नसकिएको उनको भनाइ छ । उनले थपिन्, ‘लुम्बिनीलाई अन्य पर्यटकीय क्षेत्रसँग जोडन पर्यटकीय परिपथ बनाउन पनि सकिन्छ । गौतमबुद्ध विमानस्थल निर्माणको काम छिटो सक्नुपर्छ ।’ उनले प्रदेश सरकारले घोषणा गरेको लुम्बिनी भ्रमण वर्ष घोषणा गरेकोमा खुशी व्यक्त गरिन् । 

भ्रमण वर्षले प्रदेशमा विकासका सम्भावना खोज्ने खोज्ने उनले बताइन् । प्रदेश सरकारको अभियानले नेपाल भ्रमण वर्ष सफल बनाउन परिपूरक हुने राष्ट्रपतिको भनाइ छ । ‘देशको अर्थतन्त्रको यस्ता कार्यले टेवा पुर्‍याउन सक्छ । भौतिक संरचना निर्माण गर्दै स्थानीय श्रमको कदर गरिनुपर्छ लुम्बिनीको विकास गरिनुपर्छ,’ राष्ट्रपतिले भनिन् ।  

बौद्ध दर्शनको विश्वभर पुर्‍याउन लुम्बिनी विश्वविद्यालयलाई विभिन्न ज्ञान केन्द्रको रूपमा विकास गरिनुपर्ने उनले बताइन् । विश्वभरका बौद्धमार्गीहरूलाई जागृत गर्न बुद्ध जयन्ती प्रेरणादायी हुने र लुम्बिनी शान्ति विकास र समृद्धिको आधार रहेकोको उनले बताइन् ।