चितवन- प्रहरीले चितवनले कृषि तथा वन विज्ञान विश्वविद्यालय रामपुरका कृषि सङ्कायका सहायक डिन प्रा. विष्णुराज ओझालाई कालोमोसो दल्ने ६ विद्यार्थीलाई पक्राउ गरेको छ । उनीहरूलाई मंगलवार रामपुर क्याम्पस परिसरबाट पक्राउ गरिएको हो ।

प्रहरी नायब उपरीक्षक दुर्गाराज रेग्मीका अनुसार पक्राउ पर्नेमा सन्तोष खतिवडा, गोपाल थापा, वामदेव रेग्मी, मिलन चौहान, विभोर गौली र सुशन पौडेल रहेका छन् । प्रा ओझाले जिल्ला प्रहरी कार्यालयमा किटानी जाहेरी दिएपछि विद्यार्थीलाई पक्राउ गरिएको हो ।

यसअघि उनीहरूलाई विश्वविद्यालय कार्यकारी परिषद्को बैठकले दुई महिनाका लागि क्याम्पसबाट निष्काशित गरेको थियो । 

उक्त समूहले गत चैत २१ गते विश्वविद्यालयका सहायक डिन ओझामाथि विभिन्न आरोप लगाउँदै विश्वविद्यालय परिसरमा दुर्व्यवहार गरेको थियो । सो घटनापछि प्रजातन्त्रवादी प्राध्यापक सङ्घले आन्दोलन गर्दै आएको थियो ।