विमानमा तातो पानीले डाम्यो महिलालाई, एयरलाइन्सले क्षतिपूर्ति दिन मानेन

जेठ ७, २०७६

काठमाडौं – स्पाइसजेट एयरलाइन्सको एक उडानमा विमान कर्मचारीको लापरवाहीका कारण महिला यात्रुको छाला डढेको छ । 

त्यसपछि ती महिला कोचिन विमानस्थलमा उपचारका लागि झर्नुपरेको छ । 


ADVERTISEMENT

मुम्बईबाट कोचिन गइरहेको फ्लाइट एसजी–१५३ मा एक विमान कर्मचारीले वृद्धलाई अति तातो पानी दिएपछि उनले समातिरहन सकेनन् र गिलासको पानी सँगै बसेकी महिला यात्रीमा खस्यो । 

तातो पानीका कारण महिलाको जाँघमा २० प्रतिशत भाग डढ्यो । उपचारका लागि महिला कोचिन विमानस्थलमा रोकिइन् । महिलाले एयरलाइन्ससँग क्षतिपूर्तिको माग गर्दा उसले अस्वीकार गरिदियो । 

घटना चैतमा भएको हो । महिला सीट नम्बर ३२एफमा बसेकी थिइन् । उनले भनिन्, ‘एकजना वृद्ध मसँगैको सीटमा बसेका थिए । उनले एयर होस्टेससँग तातो पानी मागे । मनतातो पानी ल्याइदिएको भए यो घटना हुँदैनथियो । तातो पानी परेपछि मलाई असह्य पीडा भयो र म उठेर विमान कर्मचारीकहाँ पुगें । एयर होस्टेसले मलाई बरफका टुक्रा दिइन् । मैले प्यान्ट उचालेर ग्यालरीमै उभिएर घाउमा बरफ दलें ।’

अवतरणपछि आफैंले सुटकेस लिएर ओर्लनुपरेको महिलाको भनाइ छ । विमान कर्मचारीले आफूलाई कुनै सहयोग नगरेको उनी बताउँछिन् । तर एयरलाइन्सले भने विमान कर्मचारीले महिलालाई सहयोग गरेको जनाएको छ । 

स्पाइसजेटले वृद्धलाई तातो पानी चाहिएकाले पानी नछल्किने गरी सावधानी अपनाइएको र एयर होस्टेसले आधी गिलास पानी मात्र दिएको जनायो । 

महिलाले चाहिँ यसलाई नकार्दै घाउ हेर्दा नै गिलास आधा थियो कि आधाभन्दा बढी भन्ने थाहा हुने बताइन् ।

एजेन्सी

जेठ ७, २०७६ मा प्रकाशित

प्रतिक्रिया दिनुहोस