सुर्खेत- कर्णाली प्रदेश सरकारका आर्थिक मामिला तथा योजना मन्त्री प्रकाश ज्वालाले कर्णाली प्रदेशको स्रोत अरुले लिएपनि त्यसको लाभ भने कर्णालीले नै पाउनुपर्ने बताएका छन् । शेयर किनबेच गर्ने कम्पनी 'इम्पेरियल सेक्युरिटीज'ले कर्णाली प्रदेशमै पहिलो शाखा कार्यालय उद्घाटनपश्चात पत्रकारसँग गरिएको अन्तरक्रिया कार्यक्रमलाई शुक्रवार वीरेन्द्रनगरमा सम्बोधन गर्दै मन्त्री ज्वालाले भेरी-बबई आयोजनाका कारण कर्णालीमा विवाद हुनसक्नेतर्फ संघीय सरकारको ध्यानाकर्षण गराएका हुन् ।

भेरी-बबई डाइभर्सन आयोजनाको स्रोत बाँडफाँडमा कर्णाली सरकारले संघीय सरकारसँग स्पष्ट धारणा राखेको बताएका छन् । ‘हाम्रा लागि राष्ट्रिय गौरवको आयोजना हो भनेर छातीसम्म फुलाउन सकिने अवस्था छ,’ उनले भने, ‘छाती फुलाएर मात्रै हामी समृद्ध हुन सक्दैनौं । पानी लैजाओस् तर बिजुली उत्पादनको जिम्मा हामीलाई मन्त्रालयले देओस ।’

यसबारेमा प्रधानमन्त्री, मन्त्रीसँग आफूले बारम्बार कुरा गरिरहेको उनले बताए । मन्त्री ज्वालाले कर्णाली प्रदेशका जनताको श्रोत अन्त लगिए पनि लाभ भने कर्णालीका जनताले नै पाउनुपर्नेमा जोड दिए । ‘बाँधको मुहानमा १२ मेघावाट बिजुली निकाल्न सकिने कुरा आएको छ,’ उनले भने, ‘त्यसका लागि हामी आपसी गृहकार्य गरिरहेका छौं । हामी त्यो आयोजना निर्माण गर्नेछौं ।’

उनले संघीयता कर्णालीका जनताका लागि र सिंहदरबार नदेखेका जनताका लागि आएको दाबी गरे । ‘हामीसँग धेरै विद्युत आयोजनाहरू छन् । जसका लाईसेन्स विभिन्न निजी तथा सरकारी संघसंस्थाले लिएका छन् र काम अघि बढाएका छैनन्,’ उनले भने, ‘हामी स्थानीय तहसँग मिलेर भएपनि एक जलविद्युत आयोजना बनाउने गरी अघि बढेका छौं ।’

उनले राजश्वको बाँडफाँडमा जनसंख्यालाई मात्रै हेर्ने कुरा गलत भएको बताए । सरकारले कर्णालीलाई विशेष क्षेत्र घोषणा गरेर बढी भन्दा बढी पूँजी दिनुपर्ने र बाँडफाँटको मुख्य आधार भूगोल बनाउनुपर्ने माग गरे । नेपाल धितोपत्र बोर्डका अध्यक्ष डा. रेवतबहादुर कार्की र नेपाल स्टक एक्सचेन्जका प्रमुख कार्यकारी अधिकृत चन्द्रसिंह साउदले संयुक्त रुपमा कर्णाली प्रदेशको राजधानी सुर्खेतमा शाखा कार्यालयको उद्घाटन गरेका हुन् ।

ब्रोकर नम्बर ४५ इम्पेरियल सेक्युरिटीजले कार्यालय उद्घाटन गरेसँगै सातै प्रदेशमा बजार पुगेको अध्यक्ष कार्कीले बताए । शाखा कार्यलय उद्घाटनसँगै मन्त्री ज्वालाको उपस्थितिमा धितोपत्र बजार सम्बन्धी अन्तरक्रिया कार्यक्रम समेत भएको छ । अन्तरक्रिया कार्यक्रममा अध्यक्ष कार्कीले नेपालको धितोपत्र बजारको सम्बन्धमा कार्यपत्र प्रस्तुत गरेका छन् ।

कार्यक्रममा दोस्रो बजार तथा अनलाइन प्रणालीका बारेमा जानकारी दिइएको छ । इम्पेरियलले यस अगाडि नेपालगञ्जमा शाखा कार्यालय सञ्चालनमा ल्याएको थियो । शुक्रवार उद्घाटन भएको शाखा कार्यालयसहित तीन स्थानबाट ब्रोकरको सेवा प्रदान गर्ने इम्पेरियलका प्रबन्धक निर्देशक भक्तिराम घिमिरेले बताए ।