बुटवल – बुटवलमा सोमवार बिहान देशकै ठूलो तथा सुविधासम्पन्न अन्तर्राष्ट्रिय स्तरको प्रदर्शनी केन्द्र निर्माण कार्यको शिलान्यास गर्ने कार्यक्रममा नेकपा महासचिव विष्णु पौडेल सहभागी भएका थिए ।

कार्यक्रममै नेपाली कांग्रेसका नगर सभापति खेलराज पाण्डे नेतृत्वका केही व्यक्तिले पौडेललाई ‘भ्रष्टाचारी’ भन्दै नारावाजी गरे । कार्यक्रममा अतिथि समेत रहेका पाण्डेले आफ्नो गोजीमा पर्चा लगेर फाल्न खोज्दाखोज्दै नियन्त्रणमा लिइएको थियो । 

कार्यक्रममा कांग्रेसका प्रतिनिधिले गरेको व्यवहारप्रति स्थानीय राजनीतिक दलका नेताले आपत्ति जनाएका छन् । बुटवलका उद्योगी, व्यवसायी र राजनीतिक दलका नेताले घटनाप्रति दुःख व्यक्त गरेका छन् ।

विष्णु पौडेलले रूपन्देहीमा ल्याएको विकासप्रति आत्तिएर ‘अनर्गल’ प्रचार गर्न उत्रिएको उद्योगी, व्यवसायी र राजनीति नेताहरूले बताएका छन् । नेपाल चेम्बर अफ कर्मसका केन्द्रीय सदस्य टंक पोखरेलले विकासका योजनालाई राजनीतिसँग जोडेर विरोध गर्न नहुने बताए ।

‘काठमाडौंमा पौडेलप्रति उठेको विषयको बारेमा उहाँले संसदमै दोषी भेटिए कारवाही भोग्न तयार छु भन्नुभएको छ । यस्तो अवस्थामा बुटवलको गौरवको आयोजना शिलान्यास गर्दा अनावश्यक विरोधमा उत्रिनु हुँदैनथ्यो,’ उनले भने ।

नेपाल उद्योग वाणिज्य महासंघ ५ नम्बर प्रदेशका सदस्य कृष्णकुमार श्रेष्ठले विकास निर्माणको काम गर्दा राजनीतिक विषय उठाउन आवश्यक नभएको बताए । ‘बुटवलको विकासमा विष्णु पौडेलको योगदान धेरै ठूलो छ । उहाँले बुटवलमा अन्तर्राष्ट्रिय प्रदर्शनी केन्द्र बनाउन ठूलो मेहनेत गर्नुभएको छ । त्यहीँ कार्यक्रममा विरोध स्वरुप प्रचार गरेजस्तो देखियो । यस्तो गर्न आवश्यक थिएन ।’

युवा संघ नेपाल स्थायी कमिटी सदस्य देवराज पोखरेलले विकासविरोधी अराजनीतिक गतिविधि गरे युवाले प्रतिकार गर्ने बताए । ‘कांग्रेसले बुटवलमा आज अराजनीतिक गतिविधि गर्‍यो,’ उनले भने, यस्तो फेरि दोहोरिए युवा संघले छाड्दैन ।’

नेकपा नेता तेजेन्द्र केसीले बुटवलमा राष्ट्रिय गौरवको आयोजना बन्दा अवरोधमा उत्रिएर कांग्रेसले आफ्नो असली अनुहार देखाएको बताए । नेकपा नेता गोपाल रानाले पौडेलले रुपन्देहीलाई विकासको रोलमोडल जिल्ला बनाउन लागेको देखेर कांग्रेस आत्तिएर पर्चा फाल्न बाध्य भएको बताए ।