बुटवल- राष्ट्रिय प्रजातन्त्र पार्टीका अध्यक्ष कमल थापाले मुलुकमा सबै शक्ति अटाउने गोलमेच सम्मेलन गर्न आवश्यक रहेको बताएका छन् ।

राप्रपा प्रदेश नम्बर पाँचको कार्यालय मंगलवार बुटवलमा उद्घाटन गर्दै अध्यक्ष थापाले नेत्र विक्रम चन्द ‘विप्लव’ समूहदेखि राजासम्म अट्ने गरी गोलमेच सम्मेलन गरी स्थायी राजनीतिक प्रणाली स्थापना गर्न आवश्यक देखिएको बताए । 

उनले भने, ‘१२ वर्ष अगाडि माओवादीलाई शान्ति प्रक्रियामा ल्याउन मुलुकले धेरै मूल्य चुकायो । फेरि माओवादी फेरि अर्को माओवादी पुर्नउत्थान हुँदैन । मुलुक द्वन्द्वमा फस्नबाट बचाउन राजसंस्थासहितको लोकतन्त्र स्थापना गर्न गोलमेच सम्मेलन गर्न आवश्यक छ,’ अध्यक्ष थापाले थपे, ‘पूर्ण धार्मिक स्वतन्त्रतासहितको हिन्दू राष्ट्र कायम गरौं । संघीयतामा सुधार गरी स्थानीय तहलाई बढी अधिकार दिऔं । अल्प संख्यक धर्मको संरक्षण गरौं । यो नै नेपालको लागि मध्यमार्गी र सही विकल्प हो ।’

पूर्वमन्त्री समेत रहेका थापाले नेपाल धर्मनिरपेक्ष घोषणा भएपछि विश्वकै १ नम्बरमा इसाइकरण हुने मुलुक बन्न पुगेको दाबी गरे । ‘९४ प्रतिशत ओमकार परिवारमा आबद्ध नेपाली भएको मुलुकमा तीव्र गतिमा धर्म परिवर्तन भएर इसाइकरण हुने पहिलो मुलुक बनेको छ । यसले राष्ट्रियता संकटमा परेको छ । सामाजिक सद्भाव खल्बलिएको छ । मुलुक धार्मिक द्वन्द्वमा जाने खतरा देखिएको छ ।’

थापाले मुलुक सामु ६ वटा चुनौती र समस्या आइपरेको दाबी गरे । मुलुकमा धर्मनिरपेक्षता, संघीयता र गणतन्त्र आएपछि गरीबी र बेरोजगारी, भ्रष्टाचार, धर्म र संस्कृतिमाथि आक्रमण, राष्ट्र विखण्डनको चुनौती, लोकतन्त्रको आवरणमा सर्वसत्तावाद, नयाँ रूपमा माओवादी शक्तिको पुन:उत्थान मुलुकमा नयाँ चुनौती देखिएको दाबी गरे । 

उनले सरकारले हालै ल्याएको बजेट आफ्ना नेता कार्यकतालाई पोस्ने वितरणमुखी भएको दावी समेत गरे । उनले भने, 'मुलुकको अर्थतन्त्र विप्रेशणबाट चलेको छ । राजश्व बजेटले बेरोजगारी हटाउने कुनै योजना छैन । केवल आफ्ना नेता कार्यकर्ता र आसेपासेलाई रातारात करोडपति बनाउने बजेट वितरणमुखी छ ।’

थापाले आउँदो निर्वाचनबाट आफूहरू राम्रो शक्तिका साथ उदाउने दाबी समेत गरे । 'हामीले छिमेकी (भारत)को निर्वाचनबाट पनि प्रेरणा लिन सकिन्छ । त्यहाँ २० वर्ष अगाडि २ सिट मात्र रहेको पार्टी दुई पटक सत्ताको नेतृत्वमा पुग्दैछ । हाम्रो पनि नीति र स्पष्ट छ । आउँदो निर्वाचनमा हामी पनि सत्ताको नेतृत्व गर्ने ठाउँमा पुग्छौ ।’

कार्यक्रममा राप्रपाका वरिष्ठ नेता दीपक बोहोराले राष्ट्रवादी शक्ति मिल्नुको विकल्प नभएको बताए । त्यस्तै पार्टीका उपाध्यक्ष प्रेमबहादुर भण्डारीले सरकार सर्वसत्तावाद लाद्न खोजेको आरोप लगाए । त्यस्तै महामन्त्री डा. धवलशमशेर राणाले राष्ट्रवादी शक्तिहरू मिल्नुको विकल्प नभएको बताए । राप्रपा प्रदेश अध्यक्ष प्रदीप उदयले संगठन विस्तारमा लागेर आउने निर्वाचनमा पार्टीलाई भारी बहुमतका साथ विजयी गराउने गरी लाग्न कार्यकताहरूलाई आग्रह गरे ।