विश्वकप क्रिकेट :अस्ट्रेलिया र वेस्ट इन्डीज उत्तिकै सशक्त, रोमाञ्चक भिडन्त अपेक्षित

जेठ २३, २०७६

काठमाडौं – विश्वकप क्रिकेटमा बिहीवार अस्ट्रेलिया र वेस्ट इन्डीज ट्रेन्ट ब्रिजमा भिड्दैछन् । 

वेस्ट इन्डीजले आफ्नो पहिलो खेलमा पाकिस्तानलाई ध्वस्त पारेको थियो भने अभ्यास खेलमा न्युजील्यान्डलाई धूलो चटाएको थियो । त्यसैले उसको मनोबल उच्च छ । 


ADVERTISEMENT

त्यसो त अस्ट्रेलियाले ब्रिस्टोलमा अफगानिस्तानलाई हराएर प्रतियोगितको शुरूआत शानदार रूपमा गरेको छ । अनि अभ्यास खेलमा अस्ट्रेलियाले वेस्ट इन्डीजलाई हराइसकेको पनि छ । र विश्वकपअघिको त्रिपक्षीय एकदिवसीय शृंखलामा बंगलादेशले वेस्ट इन्डीजलाई हराएको थियो । 

अस्ट्रेलियाका प्रशिक्षक जस्टिन ल्यांगरले आन्द्रे रसेल र क्रिस गेल भएकाले वेस्ट इन्डीज खतरनाक टोली भएको स्वीकार गरेका छन् । उसविरुद्ध खेल्नु निकै रोमाञ्चक हुने ल्यांगरको भनाइ छ । 

जेसन होल्डरको कप्तानीमा वेस्ट इन्डीजले आक्रामक खेल खेलिरहेको छ । अस्ट्रेलियाले भने टाइट खेल खेल्ने मनस्थिति बनाएको देखिन्छ । बलिङ र फील्डिङमा दबाब दिने अनि लामो समयसम्म टिकेर ब्याटिङ गर्ने रणनीति उसले बनाएको छ । अनि वेस्ट इन्डीजका ब्याट्स्म्यानविरुद्ध शर्ट बल फ्याँक्न सक्छ अस्ट्रेलियाले । आखिर वेस्ट इन्डीज आफैंले शर्ट बल हानेर पाकिस्तानलाई सानो स्कोरमा समेटेको थियो । 

ट्रेन्ट ब्रिजको पिच सुक्खा छ र त्यसले क्रस सीम बल फाल्न बलरहरूलाई उत्प्रेरित गर्नेछ ।

अस्ट्रेलियाका बलर मिचेल स्टार्क र वेस्ट इन्डीजका आन्द्रे रसेलको बलिङ हेर्नलायक हुनेछ ।

अस्ट्रेलियाले अफगानिस्तानविरुद्ध उतारेको टीमलाई नै आज खेलाउने सम्भावना छ । 

ट्रेन्ट ब्रिजमा उच्च स्कोर बनिरहेको हुन्छ र पाकिस्तानले इंग्ल्यान्डलाई जित्दा उच्च स्कोर नै बनेको थियो । आजको खेलमा पनि उच्च स्कोर बन्ने सम्भावना छ । 

एजेन्सी

जेठ २३, २०७६ मा प्रकाशित

प्रतिक्रिया दिनुहोस