सुर्खेत- कर्णाली प्रदेश सरकारको सर्वाधिक महत्त्वाकांक्षी योजना सुर्खेत–हिल्सा लोकमार्गको सम्भाव्यता अध्ययन सकिएको छ । चाइना रेल्वे इन्जिनियरीङ कम्पनीले आफ्नै लागतमा सुर्खेत–हिल्सा सडकको सम्भाव्यता अध्ययन पूरा गरी प्रदेश र संघ सरकारलाई प्रतिवेदन बुझाएको छ ।

मुख्यमन्त्री महेन्द्रबहादुर शाही र आर्थिक मामिला तथा योजनामन्त्री प्रकाश ज्वालाको चीन भ्रमणका बेला चाइना रेल्वे इन्जिनियरिङ कम्पनीसँग एमओयू गरिएको थियो । एमओयूपछि चिनियाँ कम्पनीले हवाई र स्थलगत सम्भाव्यता  अध्ययन (फिजिविलिटी स्टडी) गरेको थियो ।

अध्ययनपछि कर्णाली प्रदेश सरकार र संघ सरकारलाई प्रतिवेदन बुझाएको छ । त्रिदेशीय महत्वको सुर्खेत-हिल्सा सडक ४ सय ३ किलो मिटर रहने प्रतिवेदनमा उल्लेख गरिएको छ । आधा दर्जनभन्दा बढी स्थानमा पुल निर्माण गर्नुपर्ने, सडक दुई लाइनको बनाउनुपर्ने जस्ता विषय प्रतिवेदनमा उल्लेख गरिएको आर्थिक मामिला तथा योजनामन्त्री प्रकाश ज्वालाले बताए ।

कर्णाली सरकारसँग एमओयू गरेपछि चिनियाँ कम्पनीले एक महिना सम्भाव्यता अध्ययन गरेको थियो । २० जना इन्जिनियरको टोलीले अध्ययन सकेर प्फ्रातिवेदन बुझाएका छन् ।

‘सुर्खेत हिल्सा सडक नेपालका लागि मात्र नभई छिमेकी देश भारत र चीनका लागि पनि निकै उपयोगी सडक बन्नेछ । मानसरोवर र कैलाश पुग्ने तिर्थयात्री तथा पर्यटकका लागि निकै उपयोगी हुनेछ,'  मन्त्री ज्वालाले भने, ‘भारतबाट वर्षेनी लाखौको संख्यामा मानसरोवर पुग्नेछन् र यसले कर्णालीको समृद्धिमा ठूलो योगदान दिनेछ ।’

कर्णाली करिडोरको निर्माण कार्य सम्पन्न भएपछि सुर्खेतबाट हिल्सा ९ देखि १० घण्टाको हुनेछ । सडकको अवस्था राम्रो बनाउन सके भारतीय र अन्य तेस्रो मुलुकका पर्यटकहरू यही मार्ग भएर मानसरोवर कैलाश पुग्ने मन्त्री ज्वालाको भनाई छ ।

‘संघीय सरकारले पनि यो मार्गका लागि बजेटको व्यवस्था गरेको छ,' मन्त्री ज्वालाले भने, ‘यो सडक निर्माण सम्पन्न गर्नसके कर्णालीको मुहार नै बदलिनेछ । एक नौलो इतिहासको रचना हुनेछ ।’

यद्यपी अहिले नै सबैकुरा अन्तिम अवस्थामा नपुगेको मन्त्री ज्वालाको भनाई छ । ‘अहिले कम्पनीले अध्ययन गरेर डिपीआर बनाएर दिएको मात्रै हो,' उनले भने, ‘अब सरकारले यो कार्यलाई अगाडि बढाएको खण्डमा सुर्खेत-हिल्सा सडक बन्नेछ र कर्णालीका जनताको आर्थिक स्तर उकास्न महत्वपूर्ण भूमिका खेल्नेछ ।’