काठमाडौं – दक्षिण कोरियाको एउटा गैरसरकारी संस्थाले उत्तर कोरियाका ३१८ वधशाला पत्ता लगाएको छ । यसको उपयोग सरकारले सार्वजनिक रूपमा मृत्युदण्ड दिनका लागि गर्ने गरेको छ ।

एनजीओले विगत चार वर्षमा देश छोडेका ६१० जनासँग कुराकानी गरेर रिपोर्ट तयार पारेको हो । 

दशकौंदेखि दिँदै आएको मृत्युदण्डको विवरण यसमा खुलाइएको छ । मारिने व्यक्तिहरूको अपराध दक्षिण कोरियाली टीभी च्यानल हेर्नेदेखि गाई चोर्नेसम्मको रहेको बताइएको छ । 

एनजीओका अनुसार, नदी, मैदान, बजार, विद्यालय र खेलमैदान जस्ता ठाउँमा सार्वजनिक मृत्युदण्ड दिने गरिएको छ । 

मृत्युदण्ड हेर्नका लागि एक हजारभन्दा बढी मानिसको भीड जम्मा हुने गरेको प्रतिवेदनमा उल्लिखित छ । 

दोषी व्यक्तिको परिवारलाई अनि बालबच्चालाई समेत हत्याको दृश्य हेर्न बाध्य बनाइने गरेको रिपोर्टको दाबी छ । 

मारिएका व्यक्तिको शव परिवारलाई दुर्लभै मात्र फिर्ता दिने गरिएको छ । 

मृत्युदण्डको सजाय पाउने व्यक्तिहरूमध्ये सबैभन्दा कम उमेरको व्यक्ति सात वर्षको बच्चा थियो । 

कैयौं सार्वजनिक मृत्युदण्ड जेल र श्रमशिविरहरूमा दिइएको थियो । त्यहाँ राजनीतिक अपराधको सजाय खेपिरहेका मानिसलाई शारीरिक श्रम गर्न लगाइन्छ । 

देश छोडिसकेका एक व्यक्तिले सन् २००० को आरम्भमा श्रम शिविरबाट भाग्ने प्रयास गर्ने तीन महिलाको हत्या हेर्नका लागि ८० कैदीहरूलाई बाध्य बनाइएको बताए । 

रक्षा मन्त्रालयका अधिकारीहरूले भीडतर्फ फर्केर 'तिमीहरूको हालत पनि यस्तै हुनेछ' भनी चिच्याएको उनले बताए । 

मानिसहरूमा हत्याको डर उत्पन्न गर्नका लागि यस्ता हत्या गर्ने गरिएको प्रतिवेदनमा लेखिएको छ । सरकारले नचाहेको काम जनताले नगरून् भनी मृत्युदण्डको भय देखाइने गरेको छ । 

अधिकांश मृत्युदण्ड गोलीप्रहार गरेर दिइने गरिएको छ । प्रायः तीनजना बन्दूकधारीले तीनचोटि दोषी व्यक्तिको शरीरमा गोली चलाउने गरेका छन् । 

मृत्युदण्ड दिने मानिसहरू प्रायः नशामा लट्ठ हुने गरेको धेरै मानिसले बताए । 

दोषीहरूको छाला पनि काढ्ने गरिएको बताइएको छ । 

प्रतिवेदन लेख्ने व्यक्तिहरूमध्ये एक एथन शिनले एएफपीलाई बताए, ‘सार्वजनिक मृत्युदण्डको सजाय अहिले निकै घटेको छ ।’ तर प्योङयाङले गोपनीयता अपनाएर अझै पनि मृत्युदण्ड दिइरहेको हुनसक्ने उनको भनाइ छ । 

विगतमा अनेकौं अधिकारीहरूलाई मृत्युदण्ड दिइएको थियो । तर मृत्युदण्डका केही खबरहरू भने झूटा साबित भएका थिए ।

बीबीसीबाट