प्रधानमन्त्रीसँग भिडियो संवाद गर्न मुख्यमन्त्री राउतको कार्यकक्षमा स्टुडियो बन्दै

जेठ २९, २०७६

जनकपुरधाम- प्रदेश नम्बर दुईका मुख्यमन्त्री लालबाबु राउतको कार्यकक्षमा स्टुडियो निर्माण भइरहेको छ ।

बुधवार राउतको कार्यकक्षमा पुग्दा त्यहाँ स्टुडियो निर्माण भइरहेको दृश्य देखिएको थियो । राउतको कार्यकक्षको बायाँपट्टिको कोठामा स्टुडियो निर्माण कार्य भइरहेको छ ।


ADVERTISEMENT

कोठामा ध्वनि प्रतिरोधात्मक सामग्रीहरू राखिनुका साथै राउण्ड टेबलसहित फर्निचर जडान भइरहेको छ । त्यहाँ ठूलो टेलिभिजन समेत राखिएको छ । स्टुडियो किन निर्माण हुँदै छ त ? मुख्यमन्त्री राउतका प्रमुख स्वकीय सचिव जितेन्द्र प्रसाद यादवले लोकान्तरसँग भने, ‘प्रधानमन्त्रीज्युसँग प्रत्यक्ष भिडियो सम्मेलन गर्नका लागि स्टुडियो निर्माण भइरहेको हो ।’

प्रधानमन्त्री तथा मन्त्रीपरिषदको कार्यालयबाटै खटिएको ठेकेदारले स्टुडियो निर्माण गर्ने काम गरिरहेकाले के कति लागत लाग्ने, कस्तो डिजाइन हुनेबारे प्रदेश सरकारलाई जानकारी नरहेको उनले बताए ।

सिस्को कम्पनीले स्टुडियो निर्माण गरिरहेको उनले जानकारी दिए । इन्टरनेटमार्फत भिडियो सम्मेलन गर्नका लागि प्रविधि समेत जडान भइरहेको उनले बताए ।

यसअघि गत जेठ १० गते शुक्रवारका दिन प्रधानमन्त्री ओलीले सात वटै प्रदेशका मुख्यमन्त्रीहरूसँग भिडियो सम्मेलनमार्फत संवाद गरिसकेका छन् । ‘त्यस दिन प्रधानमन्त्रीज्युले सात वटै प्रदेशका मुख्यमन्त्रीहरूसँग भिडियो सम्मेलन गर्नु भएको थियो,’ मुख्यमन्त्री राउतका प्रमुख स्वकीय सचिव यादवले भने, ‘करीब आधा घण्टा जति प्रधानमन्त्री र मुख्यमन्त्रीहरूबीच भिडियो संवाद भएको थियो ।’

प्रधानमन्त्री ओलीले सात वटै मुख्यमन्त्रीसँग संवाद गरेको भए पनि मुख्यमन्त्रीहरूबीच एकआपसमा भने संवाद भएको थिएन । यादवका अनुसार बजेट भाषण हुनुभन्दा पहिले ओलीले मुख्यमन्त्रीहरूसँग पालैपालो कुराकानी गरेका थिए ।

मुख्यमन्त्री राउतले जनसंख्याको आधारमा बजेट विनियोजन गर्न तथा कर्मचारी छिटोभन्दा छिटो पठाइदिन प्रधानमन्त्री ओलीलाई आग्रह गरेका थिए । कर्मचारी नहुँदा विकास निर्माणको काम धेरै पछाडि पर्नुका साथै विकासको रकम समेत खर्च हुन नसक्ने भएकाले यथाशिघ्र कर्मचारी पठाइदिन राउतले ओलीसँग आग्रह गरेका थिए । ‘जवाफमा सात वटै प्रदेशलाई समान ढंगले हेर्ने तथा बिस्तारै सबै समस्या समाधान हुने प्रतिबद्धता समेत व्यक्त गर्नु भएको थियो,’ यादवले भने ।

जेठ २९, २०७६ मा प्रकाशित

अजय अनुरागी

अजय अनुरागी लोकान्तरका लागि प्रदेश नम्बर दुई प्रतिनिधि हुन् । 

लेखकबाट थप...

प्रतिक्रिया दिनुहोस