काठमाडौँ - स्वीजरल्याण्डको जेनेभामा नेपाल र संयुक्त अरब इमिरेट्स (युएई)बीच श्रम सम्झौतामा हस्ताक्षर भएको छ ।

शुक्रवार जेनेभामा श्रम रोजगार तथा सामाजिक सुरक्षा मन्त्री गोकर्ण बिष्ट र युएईका समकक्षी नासिर विन थानीबीच श्रम सम्झौतामा हस्ताक्षर भएको हो ।

मन्त्री बिष्ट र युएईका समकक्षी थानी दुवै अन्तर्राष्ट्रिय श्रम संगठनको शतवार्षिकी कार्यक्रमलाई सम्बोधन गर्न जेनेभामा पुगेका थिए । यसअघि सन् २००७ मा भएको द्वीपक्षीय श्रम सम्झौतालाई शुक्रवार भएको सम्झौताले विस्थापन गरेको छ ।

सम्झौतामा युएई जाने कामदारले कुनै शूल्क तिर्नु नपर्ने उल्लेख गरिएको छ । नेपाली कामदारलाई युएई लैजाने खर्च सबै रोजगारदाता कम्पनीकै भएको बताइएको छ ।

तर म्यानपावर कम्पनीको सेवा शूल्क आपसी समझदारीमा तय गर्ने सम्झौतामा उल्लेख गरिएको छ ।

सम्झौतामा कामदारलाई निशुल्क कानूनी सेवा, रोजगारदाता परिवर्तन गर्न पाइने, कार्यस्थल र स्वास्थ्य बीमाको व्यवस्था लगायतका सुविधाहरू दिने उल्लेख गरिएको छ ।

करारपत्र सकिएपछि रोजगारदाता परिवर्तन गर्न पाइने र नेपाली कामदारले अन्य विदेशीसरह नै सेवा सुविधा पाइने कुराको ग्यारेन्टी गरिएको मन्त्रालयका सचिव रामप्रसाद घिमिरेले बताएका छन् ।