भवन बनाउने क्रममा बिम भत्किँदा ३ जनाको मृत्यु , सवारी दुर्घटनामा ५ जनाको मृत्यु

जेठ ३२, २०७६

दाङ-लमही नगरपालिका-७ कमानपुरस्थित सम्राट सिमेन्ट कम्पनीको नयाँ भनव बनाउने क्रममा बिम भत्किँदा ३ जनाको शनिबार बिहान मृत्यु भएको छ । मृत्यु हुनेहरुमा भारत झारखण्ड बस्ने ४५ वर्षीय मंगल केस्यप, २२ वर्षीय दयाल हेरेन्द्र खुट्टा र ४६ वर्षीय लाल सायप रहेका छन् ।

उक्त कम्पनीको बिम भत्किँदा ५ जना कामदार घाइते भएको भन्ने खबर प्राप्त हुनासाथ ईलाका प्रहरी कार्यालय अमेलियाबाट खटिएको प्रहरीले घाइतेहरुलाई उपचारको लागि फोलोरेन्स अस्पताल लमही दाङ पठाएकोमा उपचारको क्रममा घाइतेमध्ये उनीहरु ३ जनाको मृत्यु भएको हो ।


ADVERTISEMENT

यताकाभ्रे, सप्तरी, बारा र बाग्लुङमा भएका छुट्टाछुट्टै सवारी दुर्घटनामा ५ जनाको मृत्यु भएको छ ।

काभ्रेको धुलिखेल नगरपालिका-९ कुसडाँडास्थित सडकमा बिआर ३२ पिए ४३४१ नम्बरको स्कारपिओ गाडीले बा.७० प ८९९८ नम्बरको मोटरसाइकललाई शुक्रबार दिउँसो ठक्कर दिँदा गम्भीर घाइते भएका मोटरसाइकल चालक माहाभारत गाउँपालिका-८ बस्ने ३६ वर्षीय तिलक आलेको धुलिखेल अस्पतालमा उपचारको क्रममा मृत्यु भएको छ । साथै दुर्घटनामा घाइते भएकी मोटरसाइकलमा सवार महाभारत गाउँपालिका-३ बस्ने २३ वर्षीया लक्ष्मी माया घिसिङको सोही अस्पतालमा उपचार भइरहेको छ । गाडी र चालकलाई प्रहरीले नियन्त्रणमा लिएको छ ।

काभ्रेकै धुलिखेल नगरपालिका-११ सिमलबोटस्थित सडकमा बा.२ क ४६७५ नम्बरको टिपर शनिबार बिहान आफै अनियन्त्रित भई सडकबाट अन्दाजी एकसय मिटर तल खसेर दुर्घटना हुँदा गम्भीर घाइते भएका टिपरमा सवार गोरखाका २६ वर्षीय भुपेन्द्र रेग्मीको धुलिखेल अस्पतालमा उपचारको क्रममा मृत्यु भएको छ ।

सप्तरीको शम्भुनाथ नगरपालिका-७ मोहनपुरस्थित सडकमा स.१ त १७९२ नम्बरको ट्याक्टरले लु.४९ प ९१७० नम्बरको मोटरसाइकललाई शुक्रबार राति ठक्कर दिँदा गम्भीर घाइते भएका मोटरसाइकल चालक सुरुङ्गा-१ हनुमान चौक बस्ने २५ वर्षीय रामदयाल महतोको सगरमाथा अञ्चल अस्पताल राजविराजमा उपचारको क्रममा मृत्यु भएको छ । फरार ट्याक्टर चालकको प्रहरीले खोजी गरिरहेको छ । 

बाराको जितपुर सिमरा उपमहानगरपालिका-२३ स्थित सडकमा ना.२ ख ४५४६ नम्बरको ट्रकले ना.१ त ९५१० नम्बरको ट्रयाक्टरलाई शुक्रबार राति ठक्कर दिँदा गम्भीर घाइते भएका ट्रयाक्टरमा सवार कलैया उपमहानगरपालिका-२२ बस्ने ६५ वर्षीय बिस्वनाथ साहको वीरगंजस्थित नारायणी उपक्षेत्रीय अस्पतालमा उपचारको क्रममा मृत्यु भएको छ । ट्रयाक्टर चालक प्रहरीको नियन्त्रणमा छन् भने फरार ट्रक चालकको प्रहरीले खोजी गरिरहेको छ ।

बाग्लुङको गलकोट नगरपालिका-४ भेडिखोलास्थित सडकमा ध.१ ज ५१३ नम्बरको ट्याक्सी सडकदेखि अन्दाजी १५ मिटर तल खसेर शुक्रबार राति दुर्घटना हुँदा गम्भीर घाइते भएका सोही नगरपालिका बस्ने ३१ वर्षीय मन बहादुर खत्रीको मणिपाल अस्पताल पोखरामा उपचारको क्रममा मृत्यु भएको छ । दुर्घटनामा घाइते भएका चालक समेत २ जनाको सोही अस्पतलामा उपचार भइरहेको छ । 

घटनाबारे स्थानीय प्रहरीले आवश्यक अनुसन्धान गरिरहेको छ ।

जेठ ३२, २०७६ मा प्रकाशित

प्रतिक्रिया दिनुहोस