काठमाडौं – विश्वकप क्रिकेटमा आज भारत र पाकिस्तानबीच भिडन्त हुँदैछ । म्यानचेस्टरको ओल्ड ट्राफोर्डमा हुने खेलमा पानीले अवरोध नगरेमा निकै रोचक भिडन्त देख्न पाइनेछ ।

पाकिस्तानका बलर मोहम्मद आमिर बललाई मज्जाले स्विङ गराउन सिपालु छन् । अनि वहाब रियाज तीव्र गतिको बल फालेर ब्याट्स्म्यानलाई अत्याउन खप्पिस छन् । शाहीन अफ्रिदीको बलमा राम्रो शार्पनेस छ ।

यी तीन पाकिस्तानी बलरहरूले भारतीय ब्याट्स्म्यानलाई आफ्नो औंलामा नचाउने सामर्थ्य राख्छन् । त्यसमाथि भारतका दुई सर्वोत्कृष्ट ब्याट्स्म्यानहरू विराट कोहली र रोहित शर्माले देब्रे हाते तीव्र गतिका बलरको बलमाथि महारथ हासिल गर्न सकेको देखिएको छैन । त्यसैले पनि आइतवारको प्रतिस्पर्धा रोमाञ्चक हुने अपेक्षा छ । 

त्यसो त कोहलीले जस्तो बलको पनि सामना गर्ने क्षमता राख्छन् तर देब्रे हातका तीव्र गतिका बलरको सामना गर्दा भने उनी कमजोर देखिएका छन् । विशेषगरी पाकिस्तानी बलरहरूले उनलाई अत्याएका छन् । 

जुनेद खानले कोहलीलाई २४ बल फालेका छन्, दुई रन दिएका छन् अनि तीनपटक आउट गराएका छन् । वहाब रियाजले उनलाई दुईपटक आउट गराएका छन् । कोहलीले पाकिस्तानविरुद्धको १२ पारीमध्ये १० वटामा आउट हुँदा ६ पटक देब्रे हाते बलरहरूले पेभिलियन फर्काएका हुन् । यो दैवसंयोग मात्र हैन, कोहलीको कमजोरी नै हो ।

पाकिस्तानी बलरहरूले कोहली र रोहितलाई एलबीडब्ल्यू आउट खुबै गर्ने गरेका छन् । एलबीडब्ल्यूबाट बच्नका लागि सचिन तेन्दुलकरले बलरको बल आउनुअघि नै क्रीजबाट अलिक अघि बढ्ने गरेका थिए । त्यसो गर्दा उनलाई बलको लाइन र लेन्थलाई आफूअनुकूल ढाल्न सहज हुन्थ्यो । तर अहिलेको पुस्ताका भारतीय ब्याट्स्म्यानहरू विकेटअगाडि शफल गर्छन् र एलबीडब्ल्यूको शिकार बन्छन् । 

वहाब रियाजको सबभन्दा ठूलो हतियार बाउन्सर हो र उनी ब्याट्स्म्यानलाई कुनै रूम नदिने गरी मिडल स्टम्पमा पिच हुने गरी बल फाल्छन् । उनको अर्को खतरनाक हतियार भनेको दाहिने हाते ब्याट्म्यानबाट बल अवे मुभ गराउन सक्नु पनि हो । 

अनि शाहीन अफ्रिदी गूड लेन्थमा बल नियमित रूपमा फाल्न माहिर छन् । उनी अग्ला छन् र गूड लेन्थमा बाउन्स गराउन खप्पिस छन् । उनको एक्स्ट्रा बाउन्सले ब्याट्स्म्यानलाई झुक्याएर आउट गराउने क्षमता राख्छ । 

आमिर, रियाज र अफ्रिदीले राम्रो लेन्थमा बल फाल्ने भएकाले भारतीय ब्याट्स्म्यानहरू उनीहरूबाट सचेत हुनु जरूरी छ । आमिर फुलर लेन्थमा बल फाल्छन्, रियाज ब्याक अफ लेन्थमा विश्वास गर्छन् र अफ्रिदी गूड लेन्थका शिकारी हुन् । यी तीनजनालाई पन्छाउन सके मात्र भारतीय ब्याटिङ चल्नेछ ।

एजेन्सी