स्याङ्जा- स्याङ्जाको वालिङ नगरपालिकाले बाँसगढी नगरपालिकासँग गोलरहित बराबरी खेल्दै उपपमेयर कप अन्तर नगरपालिका महिला फूटबल प्रतियोगिताको सेमिफाइनलमा प्रवेश गरेको छ ।

हलचोकस्थित सशस्त्र प्रहरी बल (एपीएफ) को मैदानमा सोमवार भएको लीग चरणको अन्तिम खेलमा वालिङ नगरपालिकाले बाँसगढी नगरपालिका गोलरहित बराबरी खेल्दै सेमिफाइनल यात्रा तय गरेको हो । यस खेलसँगै वालिङ नगरपालिका प्रतियोगिताको सेमिफाइनलमा पुग्ने पहिलो टोलीसमेत बन्न सफल भयो ।

समूह 'ए' मा रहेको वालिङले दुई खेलमा जीत र एक बराबरीसहित सात अङ्क जोडेको छ भने सोही समूहमा रहेको बाँसगढीको ५ अङ्क । अखिल नेपाल फुटबल सङ्घ (एन्फा)को महिला फूटबल समितिले आयोजना गरेको उक्त प्रतियोगितामा विभिन्न १८ टोली सहभागी छन् ।

लीग कम नकआउटका आधारमा भएको उक्त प्रतियोगिताको विजेता टोलीले पाँच लाख तथा उपविजेताले तीन लाख रुपैयाँ पाउनेछन् । त्यस्तै प्रतियोगितामा फेयर प्ले टोलीले ५० हजार, सर्वोकृष्ट खेलाडीले २५ हजार तथा विधागततर्फ उत्कृष्ट हुनेले जनही १० हजार रुपैयाँ पाउनेछन् ।