काठमाडौं– प्रमुख प्रतिपक्षी दल नेपाली कांग्रेसले सदनमा प्रमुख प्रतिपक्ष दलका नेतालाई नै बोल्न समय नदिनु सभामुखको गैरउत्तरदायी कार्य भएको आरोप लगाएको छ । 

प्रतिपक्ष, जनप्रतिनिधि र जनताले उठाएका जनअधिकारका कुराहरूलाई कुण्ठित गर्न र संविधानका प्रावधानहरूलाई उल्लङ्घन गर्दै संविधान प्रतिकूल कानून बनाउने क्रियाकलापमा सत्तापक्ष अगाडि बढिरहेको कांग्रेसको आरोप छ । 

कांग्रेस संसदीय दलका प्रमुख सचेतक बालकृष्ण खाँणले मंगलवार एक विज्ञप्ति प्रकाशित गरी मंगलवारको घटनालाई असंसदीय अभ्यास भएको बताएका हुन् ।

प्रधानमन्त्रीभन्दा पहिले आफ्नो दलका नेताले सम्बोधन गर्न पाउनुपर्ने भन्दै कांग्रेसले विरोध जनाएपछि रोष्टममा पुगेका प्रधानमन्त्री केपी शर्मा ओली सम्बोधन नगरी फर्केका थिए । 

‘आज बसेको प्रतिनिधिसभाको बैठकमा नेपाली कांग्रेस संसदीय दलका नेता माननीय शेरबहादुर देउवाज्यूले बोल्नका लागि समय माग गर्नुभएकोमा सम्माननीय सभामुखले संसदीय अभ्यासलाई उल्लङ्घन गर्दै प्रमुख प्रतिपक्ष दलको नेतालाई बोल्न समय उपलब्ध नगराएको प्रति हामी गम्भीर आपत्ति प्रकट गर्दछौं,’ खाँणले विज्ञप्तिमा भनेका छन्, ‘विचार र अभिव्यक्ति स्वतन्त्रताको रक्षाका लागि सदनको बेल घेर्नुपर्ने अवस्था सिर्जना भएको छ । सदनमा प्रमुख प्रतिपक्ष दलका नेतालाई नै बोल्न समय नदिनु सभामुखको गैरउत्तरदायी कार्य हो । यस कार्यप्रति नेपाली कांग्रेस संसदीय दल घोर भर्त्सना गर्दछ ।’ 

कांग्रेसले आम नागरिकको विचार र अभिव्यक्तिको स्वतन्त्रता रक्षा एवं संसदीय सर्वोच्ता कायम गर्न दृढतापूर्वक आफ्ना धारणा राख्ने खाँणले बताए ।