मध्यपश्चिमाञ्चल विश्वविद्यालयमा ‘मनपरीतन्त्र’ ! विद्यार्थी आन्दोलित

असार ३, २०७६

सुर्खेत – कर्णाली प्रदेशमा स्थापित मध्यपश्चिमाञ्चल विश्वविद्यालयमा मनपरीतन्त्र देखिएको भन्दै विद्यार्थी आन्दोलित भएका छन् ।

विश्वविद्यालयको केन्द्रीय क्याम्पससहित अन्य १० वटा आंगिक क्याम्पसको प्रचारप्रसार गर्नुको साटो असार ३ गते आयोजित दौड प्रतियोगितामा निजी कलेजको नाम लेखेको टी–सर्ट वितरण गरिएको भन्दै विद्यार्थी आन्दोलित भएका हुन् ।


ADVERTISEMENT

विश्वविद्यालयका उपकुलपति प्रा.डा. उपेन्द्रकुमार कोइरालाको मनपरी बढेको र निजी कलेजबाट कमिसन खाएको आरोप लगाउँदै विद्यार्थी आन्दोलित भएका छन् । विद्यार्थीले विश्वविद्यालयको वार्षिकोत्सव समारोह आयोजना गरिएको हलमा नै नाराबाजी गर्दै उपकूलपति डा. कोइरालाको राजीनामा समेत माग गरेका छन् ।

उपकुलपति कोइरालाले विश्वविद्यालयलाई व्यापारिक थलो बनाएको नेपाल विद्यार्थी संगठनका केन्द्रीय सदस्य हरिप्रसाद शर्माले बताए । ‘उपकुलपतिले राजनीति गर्ने थलोका रुपमा विश्वविद्यालयलाई स्थापना गर्ने गरेको हामीले बुझेका छौं,’ उनले भने, ‘हामी शैक्षिक हबका रुपमा यसलाई विकास गरियोस् भन्ने चाहन्छौं र वार्षिकोत्सवमा हाम्रा मागहरू सम्बोधन गर्दै सम्मानजनक रुपमा सहभागी गराउन माग गरेका थियौं ।’ उनले विश्वविद्यालयको वार्षिकोत्सवमा विद्यार्थीलाई सहभागी हुन नदिएर अपमान गरेको आरोप लगाए । 

‘उपकूलपतिले विश्वविद्यालय मनपरी गरेकाले आन्दोलनमा उत्रिएका हौं,’ शर्मा भन्छन्, ‘विश्वविद्यालयमा अध्ययनरत विद्यार्थीलाई प्रवेशमा रोक लगाइयोे । बाहिरका आसेपासेलाई बोलाएर वार्षिकोत्सव मनाएको छ यो सह्य हुँदैन । वार्षिकोत्सवमा विद्यार्थीलाई सहभागि हुन नदिएका कारण ठूलो क्षति हुनसक्छ । त्यसको जिम्मा उपकुलपतिले नै लिनुपर्छ ।’

नेकपा निकट अनेरास्ववियूका सुर्खेत जिल्ला कमिटी अध्यक्ष धुपेन्द्र शाहीले उपकूलपतिले आमरुपमा गल्ती स्वीकार नगरेसम्म आन्दोलन स्थगित नहुने बताए । ‘हामीले विश्वविद्यालयको गरिमामाथि आँच आउने काम नगर्न भिसी तथा विश्वविद्यालयलाई आग्रह गरेका थियौं तर पनि आग्रहलाई उहाँहरूले ठाडै अस्वीकार गर्नुभयो,’ उनले भने, ‘भीसीको दादागिरी र मनपरीतन्त्रविरुद्ध हामी विद्यार्थी संगठन आन्दोलनमा होमिएका हौं । भीसीले सार्वजनिक रुपमा नै माफी नमागेसम्म हाम्रो आन्दोलन फिर्ता हुने छैन ।’ अध्यक्ष शाहीले आफूहरूले विश्वविद्यालयले निजी कलेजको प्रचारको लागि ल्याएको टी–सर्ट जफत गरेको बताए । 

आन्दोलनका क्रममा पक्राउ गरिएका संयुक्त विद्यार्थी संगठनका १६ जना विद्यार्थीलाई प्रहरीले रिहा गरेको जिल्ला प्रहरी कार्यालय सुर्खेतका प्रमुख तथा प्रहरी उपरीक्षक वसन्त रजौरेले जानकारी दिए ।

असार ३, २०७६ मा प्रकाशित

शेरबहादुर थापा

थापा लोकान्तरकालागि कर्णाली प्रदेशका प्रतिनिधि हुन् ।

लेखकबाट थप...

प्रतिक्रिया दिनुहोस