काठमाडौं– प्रमुख प्रतिपक्षी दल नेपाली कांग्रेसका सभापति शेरबहादुर देउवाले प्रतिपक्ष बोल्ने सत्तापक्षले काम गर्ने विश्वव्यापी मान्यता रहेको बताएका छन् ।

सत्तापक्ष बोल्ने र प्रतिपक्षले बोल्न नपाउने लोकतन्त्रको परिभाषा हुन नसक्ने देउवको टिप्पणी छ । 

प्रतिनिधि सभाको बुधवारको बैठकका सभामुखसँग समय लिएर नेता देउवाले सरकारले विपक्षीलाई बोल्न नदिएर बलमिच्याइँ गरेको आरोप लगाएका हुन् ।

‘ओलीजी (प्रधानमन्त्री केपी शर्मा ओली) धेरै पहिले २०४८ सालदेखि सांसद हुनुहुन्छ । प्रधानमन्त्री बोल्दाबोल्दै बोल्न नदिएर गिरिजाप्रसाद कोइराला रोस्टमबाट लड्नु भएको हो, हामीले के गर्‍यौं उहाँलाई ?’ देउवाले प्रश्न गरे, ‘४८ दिनसम्म लगातार सदन अवरुद्ध गर्नु भएको हो उहाँहरूले, हामीले त गरेका छैनौं नि ।’

देउवाले जहाँ पनि विपक्ष बोल्ने र सरकारले काम गर्ने लोकतन्त्रको मान्यता रहेको बताए ।

‘सत्तापक्षले बोल्नु पर्ने विपक्षले बोल्न नपाउने यस्तो डेमोक्रेसी हुन्छ ? मैले बोलेपछि बोले भइहाल्थ्यो नि ! यो बलमिच्याइँ चल्दैन । कुनै हालतमा मान्दैनौं,’ देउवाले भने ।