काठमाडौं – अनेकौं वर्षदेखि बन्द रहेको ७६ वर्ष पुरानो एक प्राथमिक विद्यालय एक विद्यार्थीका लागि खोलिएको छ । 

भारतको तमिलनाडुस्थित वलपराईको यो विद्यालय राज्यको आदि द्रविडार र आदिवासी कल्याण विभागले चलाउने गरेको छ । यो विद्यालय सन् १९४३ मा चिया बगानमा काम गर्ने मजदूरका छोराछोरीका लागि खुलेको थियो ।
 

मजदूरहरू अन्यत्र पलायन भएपछि विद्यालय बन्द गर्नुपरेको थियो । 

चिन्नाकल्लारको एक चिया बगानमा काम गर्ने राजेश्वरीले ६ वर्षीय छोरो शिवालाई विद्यालयमा भर्ना गर्न चाहेको भए पनि नजिकैको स्कूल बन्द थियो । आदि द्रविडार स्कूल चार किलोमिटर पर पेरियाकल्लारमा पर्छ । 

उनले स्कूल फेरि खोलेर आफ्नो छोरालाई भर्ना लिन निवेदन दिइन् । अधिकारीहरूले उनको निवेदन स्वीकृत गरेपछि उनी खुशी भइन् । 

पेरियाकिल्लार विद्यालयका प्रधानाध्यापक एम शक्तिवेलले बताए, ‘शिवाकी आमाको आग्रहमा उसलाई एक क्लासमा सोमवार भर्ना गरिएको छ । मलाई विद्यालयमा ध्यान दिँदै उसलाई पढाउने जिम्मेवारी पनि दिइएको छ । विभागले स्कूल खोल्न विशेष कदम उठाएको छ ।’

सन् २०१७ मा विद्यालयमा एक बालिकाले पढाइ सकेकी थिइन् । त्यसपछि स्कूल बन्द भयो । स्कूलका हेडमास्टर र शिक्षकहरूलाई एक वर्षअघि अर्को स्कूलमा सरुवा गरियो । 

विभागका एक अधिकारीका अनुसार, स्कूललाई चिया बगानमा काम गर्ने मजदूरहरूको सन्तानका लागि खोलिएको थियो । त्यतिखेर ३०० मजदूरले काम गर्थे । स्कुल ७० वर्षसम्म चल्यो र हरेक वर्ष ५० भन्दा बढी बालबालिकाले पढ्थे ।

विगत केही वर्षयता मजदूरहरू अन्यत्र गएपछि स्कूल बन्द भएको थियो ।

एजेन्सी