काठमाडौं– गुठी विधेयक फिर्ता भएपछि आयोजित पत्रकार सम्मेलनमा प्रधानमन्त्री केपी शर्मा ओलीले उपत्यकावासीलाई मूर्ति चोर भनेकोमा प्रमुख प्रतिपक्षी दल नेपाली कांग्रेसका सांसदले आपत्ति जनाएका छन् । 

प्रतिनिधि सभाको बिहीवार बसेको बैठकको शून्य समयमा नेपाली कांग्रेसका सांसद राजन केसीले पत्रकार सम्मेलनमा ओलीले बोलेको कुराले उपत्यकावासी आक्रोशित भएको बताएका हुन् ।

‘गुठी विधेयक फिर्ता लिएको छ, ढिलै भएपनि सरकारको सद्भुद्धि पलाएको छ,’ केसीले भने, ‘प्रधामनन्त्रीले जुन शब्द भन्नुभयो, मुर्ति चोरदेखि अनेक लाल्छना लगाउनुभयो त्यसले उपत्यकाबासी अत्यन्तत दुःखी भएका छन् ।’

विधेयक फिर्ता भएपनि जनताले अझै विश्वास नगरेको भन्दै केसीले सम्बन्धित सरोकारवालालाई बोलाएर गुठी विधेयक व्यवस्थापन गर्न सरकारको ध्यानाकर्षण गराए ।