काठमाडौं – क्रिकेट विश्वकपको २६औं म्याचमा बिहीवार नटिंघममा विश्वविजेता अस्ट्रेलिया बंगलादेशसँग भिड्दैछ । सन् २००७ को विश्वकपपछि उनीहरू पहिलोपटक भिड्न लागेका हुन् । त्यसबेला अस्ट्रेलिया विजयी भएको थियो । 

बंगलादेशले वेस्ट इन्डीजलाई हराएर उच्च आत्मविश्वास बटुलेको छ भने अस्ट्रेलिया पनि प्रतियोगिताको पाँचौं जीतको उद्देश्यका साथ मैदानमा ओर्लिदैछ । 

अस्ट्रेलियाले भारतसँगको बाहेक सबै खेल जितेको छ । बंगलादेशले भने पाँच खेलमा दुईवटा जितेको छ । उसले दक्षिण अफ्रिका र वेस्ट इन्डीजलाई हराएको थियो भने न्युजील्यान्ड र इंग्ल्यान्डसँग हारेको थियो । 

अस्ट्रेलिया र बंगलादेश अहिलेसम्म २० चोटि भिडेका छन् । त्यसमा अस्ट्रेलिया १८ वटामा विजयी भएको छ । बंगलादेशले जम्मा एउटा खेल जितेको छ । एउटा खेलको भने परिणाम निस्केन । 

विश्वकपमा यी दुई टोली दुईपटक भिडेकोमा दुवैपल्ट अस्ट्रेलिया विजयी भएको थियो । 

बर्मिंघममा पानी परिरहेको छ र म्याचका बेलामा बादल छाउने सम्भावना छ । तापक्रम १२ देखि १५ डिग्री हुनेछ । 

यस मैदानमा ५१ एकदिवसीयमा २४ पटक पहिलो ब्याटिङ गर्ने टीम विजयी बनेको छ । पछिल्ला पाँच एकदिवसीयमा मैदानको औसत स्कोर २९५ छ । 

अस्ट्रेलियाका बलर मिचेल स्टार्क राम्रो फर्ममा छन् । उनले यस विश्वकपमा दुईचोटि चार विकेट र दुईचोटि पाँच विकेट लिएका छन् । 

कप्तान आरोन फिन्चले ३४३ रन बनाएर आफू राम्रो फर्ममा रहेको देखाएका छन् । 

उस्मान खवाजा भने प्रतियोगितामा फ्लप साबित भएका छन् । उनले पाँच म्याचमा जम्मा ९८ रन बनाएका छन् । 

बंगलादेशको कुरा गर्दा शाकिब अल हसनले प्रतियोगितामा उत्कृष्ट प्रदर्शन गरेका छन् । चार म्याचमा उनले १२८ को औसतमा ३८४ रन बनाएका छन् । उनको स्ट्राइक रेट पनि १०३.७८ छ । उनले ५.८४ को इकोनोमी रेटका साथ पाँच विकेट लिएका छन् । 

मोहम्मद सैफुद्दीनले बंगलादेशका लागि राम्रो बलिङ गरेका छन् । उनले चार म्याचमा नौ विकेट हात पारे । 

बंगलादेशका ओपनर सौम्य सरकारले यस विश्वकपमा झूर प्रदर्शन गरेका छन् । चार खेलमा उनले जम्मा ९८ रन बनाए । उनी आजको खेलमा राम्रो स्कोर बनाएर फर्ममा फर्किने आशा गरिरहेका छन् ।

एजेन्सी