अर्जेन्टिनाले फेरि एकपटक दयनीय प्रदर्शन गर्दा समर्थकहरूको चित्त कुँडिएको छ । लियोनेल स्कालोनीको प्रशिक्षणमा रहेको अर्जेन्टिनालाई प्याराग्वेविरुद्ध बिहीवार सम्पन्न खेलमा लियोनेल मेस्सीले जोगाए । 

प्याराग्वेसँग बराबरी खेलेको अर्जेन्टिनाका प्रशिक्षकलाई फूटबल रणनीतिको खासै ज्ञान नभएको स्पष्ट छ । 

प्रशिक्षक स्कालोनीको रणनीतिक ज्ञान त शून्य छँदैछ उनलाई खेलाडी व्यवस्थापनको पनि कुनै हेक्का छैन । अक्षम प्रशिक्षकका कारण अर्जेन्टिना कोपा अमेरिकाको इतिहासमा पहिलोपटक पहिलो चरणबाटै बाहिरिने स्थितिमा पुगेको छ । 

त्यसो त स्कालोनी कोही नपाएर ल्याइएका प्रशिक्षक मात्र हुन् । सन् २०१८ को विश्वकपमा तत्कालीन प्रशिक्षक जोर्गे साम्पाओलीले खराब प्रदर्शन गरेपछि अर्जेन्टिनाको फूटबल एसोसिएसनले उनको ठाउँमा स्कालोनीमा ल्याएको हो । 

अर्जेन्टिनाको प्रशिक्षक बन्नु निकै चुनौतीपूर्ण कुरा हो र त्यसका लागि कोही पनि तयार नभएपछि स्कालोनीलाई त्यो पद दिइएको हो । साम्पाओली प्रशिक्षक हुँदा स्कालोनीले भनसुन गराएर प्रशिक्षण टोलीमा पर्न सफल भएका थिए । 

शनिवार कोलम्बियासँग २–० ले हार्दा स्कालोनीको प्रशिक्षणमा अर्जेन्टिनाले पहिलोपटक प्रतिस्पर्धात्मक खेल खेल्दैथियो । उक्त खेलमा अर्जेन्टिना पटक्कै फर्ममा थिएन । 

खेल हारेपछि प्रशिक्षक स्कालोनीले आफ्नो टोलीको प्रशंसा गरे तर अर्को खेलमा व्यापक परिवर्तन गरे । प्याराग्वेविरुद्धको आजको खेलमा उनले दुई अनुभवी खेलाडी सर्जिओ अग्वेरो र एन्जल डी मारियालाई खेलाएनन् । 

अर्जेन्टिनाका पूर्वप्रशिक्षक म्याराडोना पनि खेलाडीहरू व्यापक परिवर्तन गरिरहन्थे । उनले १८ महिना प्रशिक्षण गर्दा १०८ खेलाडी परिवर्तन गरे । स्कालोनी पनि त्यही बाटो हिँड्दैछन् । एक वर्षमा उनले ५० खेलाडी परिवर्तन गरिसकेका छन् । 

खेलाडीहरूको कम्बिनेसन नमिलाएका कारण क्लबमा उत्कृष्ट प्रदर्शन गर्ने खेलाडीहरू मेस्सी, जियो लो सेल्सो, रोड्रिगो डी पल, निकोलास टाग्लिआफिको मैदानमा अजनबी जस्तो देखिए । उनीहरूले दुईवटा राम्रो पास पनि मिलाउन सकेनन् र पहिलो हाफमा जम्मा एउटा शटको अवसर जुटाए । मेस्सीको फ्रीकिकको अवसर थियो त्यो र त्यो पनि रोबर्ट फर्नान्डेजको हातमा पुग्यो । 

म्याराडोनाको प्रशिक्षण युगका खेलाडी मेस्सी हुन् । निकोलस ओटामेन्डी अर्का खेलाडी हुन् । सन् २०१० मा जर्मनीसँगको खेलमा ४–० ले पराजय भोग्दा ओटामेन्डीलाई राइटब्याकको जिम्मेवारी दिइएको थियो । 

त्यसको नौ वर्षपछि म्यानचेस्ट सिटीका यी खेलाडी आफ्नो सहज सेन्ट्रल पोजिसनमा छन् तर उनी पहिलेको जस्तो फर्ममा छैनन् । अर्जेन्टिनाले डिफेन्समा गरेको खराब प्रदर्शनमा उनको पनि योगदान रह्यो । 

आजको खेलमा मिल्टन कास्को राइटब्याक पोजिसनमा थिए र उनले मिगेल आल्मिरोनले आफूलाई छक्याएर बक्समा पुगेको हेर्नुपर्‍यो । त्यहाँ रिचर्ड साञ्चेज फुत्त पुगे अनि गोल गरिदिए । त्यतिखेर खेलमा ३६ मिनेट भएको थियो । 

बक्समा अर्जेन्टिनाका थुप्रै खेलाडी थिए तर कसैले पनि क्रसमाथि प्रतिक्रिया जनाएन । अजनबी खेलाडीहरूले केही दिनका लागि सिकारु प्रशिक्षकको प्रशिक्षणमा खेल्ने उत्साह नै नपाएको यसबाट स्पष्ट देखिन्थ्यो । 

अर्जेन्टिनामाथि अब पहिलो चरणबाटै बाहिरिने खतरा बढेको छ । मेस्सी हुँदैनथिए भने अनि भारले नजोगाएको भए अर्जेन्टिना अझै खराब स्थितिमा हुन्थ्यो । मेस्सीले पेनाल्टीको अवसरको पूर्ण सदुपयोग गरेपछि अर्जेन्टिना खेलमा फर्किन सकेको हो । 

खेल बराबरीमा आइपुग्दा स्कालोनीले दिमाग लगाउनुपर्थ्यो तर उनले खेल बुझ्नै सकेनन् । लाउटारो मार्टिनेजले आक्रमणलाई राम्रो दिशा दिन सक्थे तर डी मारियाका लागि लाउटारोलाई झिक्ने निर्णय पटक्कै बुझिएन । 

ओटामेन्डीले होश हराउँदै खतरनाक ट्याकल गरेर प्याराग्वेलाई पेनाल्टी दिए पनि अर्मानीले त्यसलाई रोकिदिए नत्र अर्जेन्टिनालाई आज निकै गाह्रो पर्ने थियो । पछिल्ला दुई कोपा अमेरिकामा फाइनलमा पुगेको टोली अर्जेन्टिना यसपालि फाइनलमा पुग्ने सम्भावना झिनो बनेको छ । 

तर अर्जेन्टिनाले आशा गुमाइहाल्ने स्थिति पनि छैन । शनिवार कतारलाई जितेमा अर्जेन्टिना क्वार्टरफाइनलमा पुग्न सक्छ । तर टोलीमा चरम अव्यवस्था छ र त्यसमाथि अहिलेका प्रशिक्षक पूरै अक्षम छन् । अहिलेसम्म प्रतिस्पर्धामा रहनु आफूहरूको भाग्य हो भनी उनले बयान दिए ।

गोल डट्कममा प्रकाशित डेनियल एड्वार्ड्सको विश्लेषण