काठमाडौं – सन् २०१८ को अक्टोबर महिनामा टर्कीको इस्तानबुलस्थित साउदी वाणिज्य दूतावासमा साउदी पत्रकार जमाल खशोग्गीको हत्याका सम्बन्धमा संयुक्त राष्ट्रसंघले बुधवार एक प्रतिवेदन प्रकाशित गरेको छ । 

उनको हत्या गरिँदा दुई हत्यारा भनिएका मानिसले दिक्क मानेको कुरा खुलेको छ । 

‘ट्रंकलाई ब्यागमा हाल्न मिल्ला त ?’ साउदी जासूसी अधिकारी माहेर मुत्रेबले सोधे । उनी साउदी युवराज मोहम्मद बिन सलमानका वरिष्ठ सल्लाहकार भएको राष्ट्रसंघका लागि गैरकानूनी हत्या सम्बन्धी विशेष प्रतिवेदकको प्रतिवेदनमा उल्लेख गरिएको छ । 

‘अँह । एकदम भारी छ,’ सलाह अल–तुबैगेले भने । उनी साउदी गृह मन्त्रालयका फरेन्सिक चिकित्सक हुन् र उनैले खशोग्गीको शरीरलाई टुक्राटुक्रा पारेर फालेका हुन् । उनले आफ्नो काम ‘सजिलो भइदिए हुन्थ्यो’ भने । 

तुबैगेले भने, ‘जोर्नीहरू त छुट्ट्याइहालिन्छ । कुनै समस्या छैन । शरीर भारी छ । शुरूमा म भुइँमा राखेर काट्छु । प्लास्टिकका झोला लिएर तिनलाई टुक्राटुक्रा पार्ने हो भने काम खलास हुन्छ । ती सबैलाई बेर्नेछौं ।’

मुत्रेब र १० अन्य व्यक्तिमाथि साउदी अरबमा पूर्पक्ष सुनुवाइ चलिरहेको छ । 

राष्ट्रसंघको प्रतिवेदनमा युवराज बिन सलमान र अन्य वरिष्ठ अधिकारीहरूमाथि अनुसन्धान गरिनुपर्ने आह्वान गरेको छ । प्रतिवेदन तयार पार्न रेकर्डिङहरू र टर्कीका अनुसन्धानकर्मीहरूले गरेको फरेन्सिक कार्य तथा साउदी अरबमा भइरहेका पुर्पक्ष सम्बन्धी जानकारीलाई आधार बनाइएको छ । 

रेकर्डिङमा आवाज सुनिएका व्यक्तिले खशोग्गीको मृत्युमा आश्चर्य नदेखाएको र उनलाई होशमा ल्याउन कोशिश नगरेकोले खशोग्गीको मृत्यु दुर्घटनावश भएको भन्ने साउदी दाबी खारेज हुने प्रतिवेदनमा उल्लेख गरिएको छ । 

खशोग्गी युवराज सलमानका कठोर आलोचक थिए र द वाशिङटन पोस्टमा स्तम्भकार थिए । उनी विवाहका लागि कागजात बनाउन इस्तानबुल स्थित साउदी दूतावास पुगेका थिए ।

एजेन्सी