काठमाडौं-नेपाल प्रहरीको डिएसपीको युनिफर्म लगाएको फोटो मोबाईलमा राखि डिएसपी हुँ भन्दै विभिन्न व्यक्तिहरूलाई देखाई धाक धम्की दिनुका साथै अभद्र व्यवहार गर्ने कार्यमा संलग्न काठमाडौं जोरपाटी बस्ने काभ्रे घर भएका ३८ वर्षीय नारायण भन्ने भोला गौतमलाई प्रहरीले पक्राउ गरेको छ । 
    महानगरीय अपराध महाशाखा काठमाडौंबाट खटिएको प्रहरीले उनलाई काठमाडौं बौद्ध नयाँवस्तीमा फेला पारी पक्राउ गरेको हो । 
    
यसैबीच    काठमाडौं जडिबुटीमा २४ वर्षीय सुवास बुढाथोकीलाई धारिलो हतियार छुरा प्रहार गरी फरार भएका २ जनालाई  बिहीबार दिउँसो प्रहरीले पक्राउ गरेको छ ।

पक्राउ पर्नेहरुमा कोटेश्वर बस्ने दोलखा गौरीमुढी-७ घर भएका १९ वर्षीय डिम्पल घिसिङ र काठमाडौं सिनामंगल बस्ने २० वर्षीय आशिष वयलकोटी रहेका छन् । 

    बुढाथोकीलाई अपरिचित व्यक्तिले छुरा प्रहार गरी गम्भीर घाइते बनाई फरार रहेको भन्ने सूचना प्राप्त हुनासाथ तत्काल महानगरीय प्रहरी प्रभाग कोटेश्वरबाट खटिएको प्रहरीले घटनामा ‍संलग्न व्यक्तिको खोजी गर्ने क्रममा काठमाडौं लोकन्थलीबाट घटना भएको ४ घण्टाभित्रै उनीहरुलाई छुरा सहित फेला पारी पक्राउ गरेको हो । घाइते बुढाथोकीको ट्रमा सेन्टरमा उपचार भइरहेको छ ।      

    यस सम्बन्धमा प्रहरीले थप अनुसन्धान गरिरहेको छ ।