काठमाडौं – इथियोपियाको उत्तरी प्रान्त अमहारामा एक सैन्य जर्नेलले कूको प्रयास गर्दा दुईजना वरिष्ठ इथियोपियाली अधिकारीहरू मारिएको सरकारी टेलिभिजनले जनाएको छ । 

अमहाराको राजधानी बाहिर दारमा कूको प्रयास भएको र इथियोपियाका प्रधानसेनापति जर्नेल सीयर मेकोन्नेन मारिएको प्रधानमन्त्री अहमद अबीले बताए । 

‘उनी निकटका मानिसले उनीमाथि गोली प्रहार गरे,’ अबीले भने । 

अबीका अनुसार, कूको प्रयास हुँदा क्षेत्रीय सरकारी अधिकारीहरू बैठकमा सहभागी थिए । 

जर्नेल सीएर बाँचेको नबाँचेको स्पष्ट हुन सकेको छैन । 

अमहाराको क्षेत्रीय सरकार प्रमुख अम्बाचेउ मेकोन्नेन र उनका सल्लाहकार मारिएको सरकारी मिडियाले जनायो । 

कूको प्रयास उक्त क्षेत्रका सुरक्षा प्रमुख जर्नेल असमन्यु त्सिगेले गरेको बताइएको छ । 

आक्रमणकारीहरूको प्रतिकार गर्दा जर्नेल सीएरलाई गोली लागेको प्रधानमन्त्री सीएरले बताए ।

गत वर्ष सत्तामा आएदेखि अबीले इथियोपियामा राजनीतिक सुधारका कदम चालेका छन् । त्यहाँ वर्षौंसम्म चलेको राजनीतिक हिंसापछि तत्कालीन प्रधानमन्त्री हेलमरियम देसालेग्नले राजीनामा दिएका थिए । 

अबीले राजनीतिक बन्दीहरू मुक्त गरेका छन्, राजनीतिक दलमाथिको प्रतिबन्ध हटाएका छन् र गम्भीर मानवअधिकार उल्लंघनका दोषीलाई अभियोजन गरेका छन् । 

तर देशमा जातीय हिंसा रोकिन सकेको छैन ।

एजेन्सी