काठमाडौं – अवैध रुपमा भारतबाट सुन ल्याएको अभियोगमा २०७५ फागुन २ गते कञ्चनपुरको झलारीका लक्ष्मण तिरुवा पक्राउ परे ।

उनको घरमा खाल्डोभित्र लुकाएर राखेको अवस्थामा ५ किलो सुन फेला पर्‍यो । 

प्रहरीले शंकर विकको घरमा पनि खाल्डोमा लुकाएर राखेको १८ किलो अवैध सुन बरामद गर्‍यो । प्रहरीले अवैध सुन कारोबार नियन्त्रणका लागि सक्रियता बढाएको छ । नेपाल प्रहरीका प्रवक्ता प्रहरी नायव महानिरीक्षक विश्वराज पोखरेल सुन अवैध कारोवारमा संलग्न व्यक्तिमार्फत सूचना लिएर अन्यलाई पक्राउ गर्ने अभियान तीव्र पारिएको बताउँछन् ।

चालू आवको ११ महिनामा सुनको अवैध कारोवारमा संलग्न १ सय ७ जनालाई पक्राउ गरिएको छ । 

अघिल्लो आवमा ९० जना पक्राउ परेका थिए । सुनको अवैध कारोबार बढ्दै गएको छ । चालू आवमा पक्राउ परेका व्यक्तिबाट ८४ किलो सुन बरामद गरिएको पोखरेलले बताए । सो क्रममा २३ करोड ५५ लाख ४१ हजार रुपैयाँ राजस्व संकलन भएको छ । महानगरीय प्रहरी कार्यालय रानीपोखरीले मात्र १२ करोड ९० लाख रुपैयाँ राजस्व संकलन गरेको छ । 

नेपाल प्रहरीका महानिरीक्षक सर्वेन्द्र खनालका अनुसार अपराध र अपराधीप्रति कानूनी कठोरताको नीति लिएकाले घटनामा कमी आएको हो । प्रहरीले अवैध सुन कारोबार नियन्त्रणलाई उच्च प्राथमिकता दिँदै आएको छ । 

आधुनिक प्रविधिको कारण कारोबारीले सुनको अवैध कारोवारमा पनि नयाँ नयाँ शैली अपनाउने गरेका छन् । प्रहरीले सक्रियता बढाउनाका साथै सूचना सञ्जाल विस्तार गरेकाले अपराध घट्दै जाने पोखरेलको भनाइ छ ।

नियन्त्रणबारे अन्तर्राष्ट्रिय विमानस्थल सुरक्षा कार्यालयका प्रमुख प्रहरी वरिष्ठ उपरीक्षक सन्दीप भण्डारीले भन्सारसँग समन्वय गरी विशेष निगरानीका साथ सुनको अवैध कारोवार गर्नेलाई पक्राउ गरिँदै आएको बताए ।