बुटवल- प्रदेश नम्बर पाँचको सोमवार बसेको मन्त्रिपरिषद बैठकले विभिन्न निर्णय गरेको छ ।

बैठकले ६ वटा निर्णय गरेको सरकारका प्रवक्ता तथा भौतिक पूर्वाधार विकास मन्त्री बैजनाथ चौधरीले जानकारी दिए ।

योजना आयोगको उपाध्यक्षमा गौतम

प्रदेश सरकारले प्रदेशको योजना आयोगको उपाध्यक्षमा प्रा.डा. इश्वर गौतमलाई नियुक्त गरेको छ । यस अगाडिका उपाध्यक्ष डा. प्रकाश कुमार श्रेष्ठले राजीनामा दिएपछि रुपन्देहीका गौतमलाई उपाध्यक्षमा नियुक्त गरिएको हो । 

श्रेष्ठले जेठ १४ गते राजीनामा दिएका थिए । सोमवारबाटै लागू हुने गरी गौतम नियुक्त भएका हुन् । बुटवलस्थित लुम्बिनी वाणिज्य क्याम्पसको २० वर्ष नेतृत्वमा रहेर काम गरेको गौतमले श्रमिक कल्याणकारी व्यवस्था (लेवल वेल फेयर) विषयमा विद्यावारिधि गरेका छन् । उनको विशेष रुचि शिक्षा क्षेत्रमा छ । एक वर्ष अगाडि मात्र उनले वाणिज्य क्याम्पसको नेतृत्व छाडेका थिए । 

दाङमा ट्रमा सेन्टर बनाउने

प्रदेश सरकारले दुर्घटनाका घाइतेहरूको विशेष उपचार गराउने उद्देश्यका साथ दाङको लमहीमा ट्रमा सेन्टर बनाउने भएको छ । चौधरीले लमही नगरपालिकाले उपलब्ध गराएको जग्गामा प्रादेशिक ट्रमा सेन्टर स्थापना गर्ने जानकारी दिए । 

मन्त्रिपरिषदले सुशासनको प्रत्याभूति गर्ने सम्बन्धमा व्यवस्था गर्न बनेको विधेयक प्रदेशशसभा समक्ष  पेश गर्न स्वीकृति प्रदान गरेको छ । 

त्यस्तैगरी घोराही उपमहानगरपालिका र चीनको सिचुआन प्रान्तस्थित यान नगरपालिकासँग भागिनी सम्बन्ध कायम गर्न नेपाल सरकारमा सिफारिस पठाउने निर्णय पनि गर्‍यो । त्यस्तै बर्दियाको ठाकुरद्वार नगरपालिका र चीनको सिचवान प्रान्तस्थित यान नगरपालिका र चीनको गुइझाउ प्रान्तस्थित लिउ पानसूयी नगरपालिकासँग भागिनी सम्बन्ध कायम गर्न नेपाल सरकारसँग सिफारिस पठाउने र जेष्ठ नागरिक ग्राम तथा अपाङ्गता नागरिक ग्राम निर्माण गर्न स्वीकृति प्रदान गर्ने निर्णय गरेको चौधरीले जानकारी दिए ।