काठमाडौं – अमेरिकाको लुइजिनिया स्टेट विश्वविद्यालयमा रहेको भेटेनरी अस्पतालमा खुट्टो भाँचिएको एक कछुवालाई चक्का लगाइएको छ । 

एक व्यक्तिले पेड्रो नाम दिएर एउटा कछुवालाई छोरा जस्तो गरी राखेका थिए । कछुवाको एउटा खुट्टा थिएन । पेड्रो केही दिनअघि हरायो अनि भेटिँदा उसको अर्को खुट्टा पनि थिएन । 

त्यसपछि ती व्यक्ति चिन्तित भए अनि भेटिनरी अस्पताल लगे । 

चिकित्सकहरूले दुर्घटनामा परेका कारण कछुवाको खुट्टा भाँचिएको पाए । त्यसपछि उनीहरूले शल्यक्रिया गर्ने सोचे । अस्पतालसँग कृत्रिम खुट्टा थिएन । त्यसैले उनीहरूले चक्का जडिदिने फैसला लिए । 

अस्पतालका सञ्चार व्यवस्थापक जिन्जर गटरले जनावरहरूको आवश्यकता बमोजिम ट्रान्सप्लान्ट गरिने गरेको र जनावरलाई कष्ट नहोस् भनी ध्यान दिइने गरेको बताए । 

एजेन्सी